如果2020年係飲食業嘅寒冬，咁2021都算係初春嘅，有好多好多嘅新餐廳開業，香港人普遍嘅消費意慾亦高咗，捨得食咗，但同時都多咗撐小店。睇返2021年最後一個月嘅十強榜，當中不乏西、日料理，亦有各式各樣嘅小店。
第10位 微醺（*新上榜） 
圖：12月係一個適合微醺嘅月份，喺節日氣氛下，同朋友/另一半飲返幾杯係幾有feel嘅，呢間設有互外座位嘅中環酒吧既有特色菜式，連cocktails都有創意過人，樣樣嘢都啱數，打入十強唔意外呀。推介可試香煎雞皮餃子配日式月見汁，用雞皮代替餃子皮，脆卜卜，送酒一流； 而奶樽裝住嘅唔係奶，係焙茶cocktail啊~
第9位 哥哥添飯•妹妹泡茶（*新上榜）
圖：台式餐廳總係有種吸引力，特別喺冇得飛嘅時間。紅燒牛肉麵等傳統台菜當然唔少得，但養生花雕鮑魚醉盤絕對值得一試，擺盤精緻，上層有醉鮑、蝦、溏心蛋，下層則有醉雞，款款入味。另外亦有多款台式小食，例如起司肉鬆蛋餅、大腸包小腸等。
第8位 蘇山雞飯
圖：唯一繼續留榜內嘅餐廳，主打星馬菜，唔少得叻沙摻摻同肉骨茶啦，叻沙摻摻居然仲係豪華版，有大大隻啖啖肉嘅龍蝦，叻沙椰汁味香濃；肉骨茶則偏重胡椒味，夠晒香口，飲完暖笠笠，搭配嘅獅城芽菜走地雞飯，雞肉嫩滑冇骨，油飯亦好香。
第7位 The BASE nature（*新上榜） 
圖：位於商場內，清新簡約嘅西餐廳，人氣旺盛，主打多款慢煮菜式。推介黑安格斯牛横腹扒，肉質細嫩仲好多汁，肉味濃郁，點配煙燻岩鹽、芥末子忌廉燒汁肉味就更突出；肉食獸另外可以選擇澳洲M級牛肉肉醬芝士漢堡或美國草飼牛肉芝士漢堡，大大份，好足料，多料到唔知由邊度開始食好。
訂座優惠：指定時段全單8折
餐飲券：特色精緻下午茶二人餐
第6位 Honbo（*新上榜）
圖：被譽為「全球最佳漢堡」嘅呢間漢堡店，新店喺尖沙咀開咗冇耐，就極速打入十大。舖頭座位唔多，部分卡座更可有海景。漢堡選擇唔算多，主要都係牛肉、雞肉或素菜，食肉獸必揀The Gold Standard，呢個雙層4安士漢堡扒厚墩墩，帶油香兼保留到肉汁，夾埋煙肉片、芝士、洋蔥等，絕對畀到滿足嘅感覺你。
第5位 南越南咖啡廳（*新上榜）
圖：香港都有唔少越式餐廳，但好似呢間咁供應炸米粉、越式蛋啤酒同南越蛋咖啡嘅就真係少之又少。餐廳由知名主廚主理，品質有保證。炸米粉炸得香脆，淋上混入香茅同青檸葉等嘅湯，味道有驚喜；南越蛋咖啡有少少似焦糖燉蛋嘅feel，面層有層焦糖脆面嘅蛋醬，既可飲到焦糖嘅甜香，後段會滲出蛋香同咖啡香，口感仲好滑𠻹。
第4位 Wagyu Ya（*新上榜）
圖：urfoodbuddies、FeivouriteFood
好似每個月都會有唔同嘅燒肉店上榜，呢個月輪到尖沙咀呢間主打JA鹿兒島直送和牛嘅日式燒肉店，和牛肉濃郁，係唔少牛魔王嘅至愛。除咗有得燒多款唔同部位外，亦有和牛小食，好似吉列和牛三文治同和牛肉眼海膽串，前者肉嫩油香，加埋薄脆麵包，口感豐富；後者直情係奢華享受啦，啖啖鮮甜甘香。
第3位 Nunu燒（*新上榜）
圖：細細間居酒屋，但菜式選擇就有好多，各種日式料理，如刺身、壽司、石鍋飯等都有，晚巿時段更有Omakase呢。推介特選串燒盛盒，塩燒厚牛の舌滿滿口感，塩燒安格斯夠juicy，荔枝豚肉卷juicy到爆汁𠻹啊。另外，牛肉壽喜燒配飯亦係一個好選擇，牛肉嫩滑，湯底甜香。
第2位 紅伶飯店（*新上榜）
圖：經典潮州打冷老字號，人氣一直高企，重開後終於首次打入十強。12月有幾日特別凍，去食羊腩煲嘅人都多咗，呢度嘅羊腩煲非常足料，而且風味十足，最緊要係有羊肉香而冇羶味，食完成晚暖笠笠。另外去到必食煎蠔餅，勁多蠔，仲要粒粒都大大粒好飽滿，點埋魚露就更惹味。
第1位 The Third Bakery（*新上榜）
圖：呢間café喺環境方面先贏一仗，餐廳充滿藝術氣息，並以傳統酒壺嚟裝水。食物方面則行fusion路線，中西合璧又啱打卡。香煎龍蝦蝦米油虎蝦扁意粉值得一試，龍蝦鮮甜彈牙；就連班戟都可以龍蝦入饌，香煎龍蝦•龍蝦沙律班戟鹹甜有致，pancake邊微微脆口，估唔到又幾夾。同埋記得留肚食甜品，即焗牛角包窩夫榛子醬雪糕同即焗法式蘋果批雲呢拿雪糕，都有濃濃牛油香呢。
文：Kar
