銅鑼灣呢間新店最近成為熱門話題，佢哋主打無麩質班戟，最搶鏡嘅三款「紗織」班戟係用特別機器，將栗子、紫薯或者甜薯蓉壓成一條條約1mm幼，再唧喺班戟上面，賣相特別。另外仲有其他口味嘅班戟同飲品供應。
 

Pancake 專門紗織位於銅鑼灣百德新街，根據負責人介紹就係同京都KITANO LAB(北野ラボ)合作，由KITANO LAB監修同產品開發，提供班戟嘅食譜畀銅鑼灣店。餐廳介紹上面寫嘅「紗織獨家研發之技術」指嘅係將米粉磨至適當嘅粗幼度，令班戟口感保持鬆軟。同京都和栗専門 紗織並無關係。
 

甜薯紗織（$148）

採訪當日未有和栗同紫薯口味，餐廳預計下週就可以供應齊三款口味喇。甜薯紗織會由師傅喺吧枱後嘅特製機器上即席製作甜薯絲，負責人稱機器可以將甜薯蓉壓成1至2mm嘅絲狀，令食材香氣、口感、味道都可以更突出。甜薯會按時令選取當季品種，而家用緊嘅就係金時番薯，甜薯蓉下面係日本厚忌廉、蛋白餅，同米粉班戟。
 

甜薯絲入口係薯蓉嘅柔滑口感，有番薯香而且味道香甜。班戟用米粉取代一般嘅麵粉，所以做到無麩質效果，食落口感鬆軟濕潤。忌廉有牛奶香亦有甜香。不過因為蛋白餅同樣味道偏甜，整體欠缺味道層次變化，如果想試嘅話建議搵個朋友一齊Share。
 

春雪·初開（$148）

另一款賣相非常搶鏡嘅就係呢款春雪·初開，以透明膠膜圍住班戟，向上一拉忌廉同紅莓果醬就會跌落嚟包住班戟。頂層嘅忌廉有濃郁牛奶香，口感厚滑。而班戟同忌廉當中仲有士多啤梨果肉，酸酸甜甜咁平衡返忌廉嘅膩度。
 

濃厚朱古力班戟（$138）

除咗原味班戟，餐廳亦有供應抹茶同朱古力口味嘅米粉班戟，好似呢份濃厚朱古力班戟用嘅就係用法國朱古力製作嘅朱古力米粉班戟，食落會多咗重朱古力香氣。配搭忌廉同雲呢拿雪糕，再加朱古力餅乾碎、煉奶，用香蕉裝飾，口感層次較為豐富。
 

黃豆粉拿鐵（$52）

飲品方面以茶同咖啡為主，坊間較為少見嘅就得呢杯黃豆粉拿鐵。聞落的確有幾突出嘅黃豆粉香，飲落甜度適中，口感順滑。
 

Pancake 專門紗織
地址：銅鑼灣百德新街57號海華大廈地下B號舖

文、相：Cathy