新一年，繼續出動食好西！正所謂食「色」性也，踏入2018年，一於跟返2018年嘅pantone colour去搵食啦，紫外光色呀！紫色控去到呢啲餐廳實好開心啫~~
紫色素食 雅 ‧悠蔬食
圖：ivansosbx、Kathy Lee 2016、yiyan0403
呢間素食餐廳嚟嘅，啱啦，新年開始食健康啲啦。整體以紫、白作為主色，柔和得嚟亦添上幾分浪漫，環境上先取一分。首推呢度嘅香芒牛油果苜蓿芽手卷，紫菜好脆，苜蓿芽草青味幾濃，但好爽，加埋芒果同牛油果嘅香甜，係幾討人歡喜。另外，黑松露薯蓉大啡菇亦相當受歡迎，香濃多汁。話明為pantone色而嚟，當然要叫返杯藍蝶花雪梨汁啦，同紫外光色一樣咁神秘夢幻，微甜，清潤。
紫色西餐 阿麥廚房
圖：moochichi、yanyanchiba、fallforco
呢間位於銅鑼灣嘅西式餐廳，一入到去，牆身走紫色格調，燈光暗暗地，係幾有feel嘅。
蟹肉南瓜忌廉湯、黑松露菌忌廉湯兩款湯嘅味道都好濃郁，各有支持者，但講到特色菜，一定係黑松露麵包蟹意大利飯。軟綿嘅Risotto混入蟹肉、蟹膏同忌廉等，再釀返喺個蟹殼度，配埋黑松露醬，夠晒香口。而呢度嘅咖啡，亦成功俘虜唔少女生嘅心呀，3D立體嘅貓貓，超得意。
紫色日菜 紫
圖：連個名都叫紫！法式日本料理嚟，餐廳當然都係以紫為主題啦，有鐵板燒都有omakase食。鐵板鮑魚、薄燒和牛等都係令人食過想返尋味嘅菜式，而Charcoal Crumble望落好似花盆咁，實際係甜品嚟呀，紫色、黃色啲花花同泥土通通都食得！而最「紫」嗰杯嘢叫Murasaki Sour，係紫色嘅lemonade嚟呀。
紫色cafe Love Cafe拉斐特
圖：以紫色做主題嘅café總係畀人一種浪漫嘅感覺，加上門口又有好多花花同熊啤啤，無論情侶定閏蜜嚟都好啱，淨係食環境都飽咗一半。
另一半就靠個自選burger填埋佢啦，法國奶油包幾脆呀，芝士控就記得揀埋車打芝士喇，配松露蛋黃醬都幾夾，餡料就睇你鍾意咩啦，三文魚、和牛等都吸引。
文：Kar
