過往幾個月嘅十強榜內，有較多都係打卡able嘅café，3月份嘅十強名單內，卻只有2間，換上嘅係各類唔同嘅日本菜，包括撈麵、鐵板燒、燒肉同豚肉串燒等。
第10位 麺屋こころ（*新上榜） 
圖：主打日本撈麵嘅麵店，招牌係正宗全料東京撈麵，第一次去嘅話建議可先試呢款。將麵條連同各生蛋黃、辣肉碎先撈勻後就食得，之後可以分別再加黑胡椒、秘製昆布香醋，甚至加白飯變肉燥飯都仲得，一碗麵有多重口感同變化。麵條係每日新鮮以全麥麵粉自家製作，口感彈牙。
第9位 味火鍋（*新上榜） 
圖：任食火鍋仲要無限時，單單係呢點已經夠晒吸引，加上任食選擇又豐富，用料又新鮮，可以慢慢食到完場，當然輕鬆打入十強榜啦。頭盤有雞煲、酸菜魚、芝士焗龍蝦同芝士焗生蠔揀，跟住又有時令海鮮拼盤同安格斯牛肉拼盤等，同時照顧晒海鮮控同牛魔王嘅慾望。
第8位 螢火（*新上榜）
圖：黑色主調嘅鐵板燒餐廳，最特別係可以畀客人寫/畫完嘢之後，投射落天燈螢幕上，用嚟許願或者送上驚喜都好有feel。鐵板燒一定要食牛，日本A5和牛有分厚燒同薄燒，薄燒嘅連埋蒜、蔥等一齊食，夠晒香口‧厚燒嘅肉味就濃郁啲。另外，鵝肝多士配埋柚子啫喱，油香滿滿但唔會太膩、甘鯛魚魚鱗脆卜卜，而魚肉幼嫩，都係師傅功架之作。
第7位 2派克雞排
圖：上月第2位台灣過江龍雞扒，今個月繼續留榜。全部嘢都係即叫即炸，係要等耐少少，但就包保樣樣都脆卜卜，好香口。雞排同雞髀同樣受人客歡迎，外脆內軟仲有肉汁，仲可任揀2款調味料配搭。其他炸物小食都好有水準，下午茶梗係要雞髀薯條啦，呢度係地瓜薯條，啖啖綿密地瓜口感，甜甜地幾好食，建議可配酸咪咪嘅梅子粉。
第6位 Paintable Café（*新上榜）
圖：位於上環嘅全白色café，具備所有受歡迎café嘅元素，又設有室內外座位（室外座位有打卡壁畫牆啊）。追求健康嘅朋友仔嚟到，無懸念，彩虹乳酪！排得好靚架，紅石榴、香蕉、奇異果、藍莓唔同水果排到好似彩虹咁，食落仲好fresh。另外亦推介呢度嘅scone，抹茶焙茶等味都唔錯，烘培時間剛剛好，口感鬆軟，仲有配自家製玫瑰蜂蜜堅果醬，真係有淡淡花香味呢。
第5位 牧羊少年與他的浮萍
圖：上個月嘅榜首，今個月微微下跌幾位，但仍然無阻呢間集結餐飲、酒吧、文藝三大概念於一身嘅文青餐廳留守十強位置。想食得豐富啲，可以選擇烤義式時令海鮮拼盤，一盤有齊帶子、大蝦、魚柳、魷魚同埋蜆，款款鮮甜，幸運嘅話大蝦更有甘甜嘅蝦膏！小食蒜香法國雞翼配是拉差醬，唔太怕辣嘅話會幾鍾意，酸酸甜甜又帶辛辣嘅醬汁調得唔錯，好開胃。
第4位 Ghetto Café（*新上榜）
圖：漢堡係香港人嘅comfort food，呢間旺角嘅漢堡店再從裝修入手，走美式街頭風格，全店皆以橙色同銀色為主調，仲有塗鴉牆設計，輕易贏得大眾歡心。招牌漢堡貧民窟大魔王漢堡 可以轉做黑色嘅竹炭包，成件事再型格咗。漢堡材料豐富，juicy手打牛肉、芝士、煙肉唔少得，仲夾多塊脆卜卜薯餅，要放肆少少擘大啲個口先咬得晒。士多啤梨smoothie雖然肥仔，但好口感好thick，仲有勁香真‧士多啤梨味，減肥嘅嘢，聽日再算啦。
第3位 Second Draft（*新上榜）
圖：成日都話大坑有好多好嘢食，呢間就係其中一間啦。作為精釀啤酒餐廳，當然有多款唔同類型嘅craft beer選擇啦，本地外國嘅都有，仲可以揀坐喺室外Chill添。食物方面都係為送酒而設，香口濃郁，大坑薯條絕對係每次必點之物，加入孜然、高菜等坊間少見配搭製作，非常惹味。特別推介啫啫雞翼煲，用料同樣大膽，係藍芝士同自家水牛醬，鹹香有致，雞翼入味又多汁。
第2位 萬丸燒肉（*新上榜）
圖：銅鑼灣日式燒肉店，座位寬敞，120分鐘任飲任食放題最平$258起，有多款豬雞牛肉等選擇，價錢絕對對得起呢度嘅環境、款式同品質。牛魔王捨得食多啲嘅，記得要揀壽喜燒汁日本A4宮崎和牛五花肉，油花豐富，又嫩又Juicy，食到好滿足。
第1位 Mokumoku Yakiton（*新上榜）
圖：位於銅鑼灣嘅日式豚肉串燒專門店榮登今個月嘅榜首位置，由日籍料理達人Kei San監修，最大賣點就係引入嚟自日本岩手縣嘅白金豚，呢款豚肉肉質鮮嫩，油花平均。而多款豬肉臟串燒則選用本地即日貨，連豬腰豬心同豬肝等都有得食。特別推介前菜豬肝慕斯，口感creamy，配埋cream cheese、番茄同餅乾，鹹香得宜。
文：Kar
