一年四季都可以打邊爐，除咗港式同台式外，仲有其他唔同選擇架。今次就介紹幾間東南亞風味嘅火鍋店畀大家，有馬拉特色嘅，亦有榴槤主題嘅泰式火鍋放題，聽到都覺得好吸引！

目錄

榴槤主題120分鐘任食套餐 泰金鍋 

榴槤控注意喇！呢間泰式火鍋推出全新榴槤任食主題套餐，主打榴槤燉香茅雞鍋，大廚先將榴槤拆肉，加入泰式傳統香茅雞湯，香氣獨特。湯底入口帶滿滿榴槤濃香，雞件濃郁入味，香茅嘅清新可以平衡榴槤膩感，味道出乎意外嘅夾！另外仲有得任食新鮮貓山王榴槤、榴槤甜品及特飲、自助吧內逾60款泰式熟食及火鍋配料～當然如果你唔食榴槤，可以揀返普通嘅放題套餐，招牌泰金冬蔭功鍋及檸檬香茅鍋都好地道，仲有人氣沙嗲串燒、秘製海南雞、黃咖喱蝦以及多款泰國直送嘅特色炸物小食添。

泰豬鍋烤肉+火鍋 小火山 

香港首間主打泰豬鍋嘅餐廳，泰豬鍋係泰國傳統國民美食，烤鍋獨特嘅設計令大家可以同時烤肉同打邊爐！先以豬油開鑊令烤肉不易黐底，烤肉時肉汁嘅精華會流入湯底令湯底更有層次。選用高品質嘅豬肉同蔬菜，搭配獨特泰式湯底同香料，如小火山牛骨船湯，採用牛骨及十多種香料藥材熬製5小時或以上，鮮甜濃郁。另有香茅椰汁雞湯，以新鮮雞肉配搭椰汁同泰國青檸等，奶香香濃不膩。自家製泰式烤肉沾醬都係其中一個highlight，包括甜雞醬、羅望子醬、亞萊蒜醬及海鮮沾醬，特別推介羅望子醬，酸酸辣辣清新解膩。

娘惹喇沙湯底 九雲居 

圖: Foodopiahk

東南亞式嘅火鍋店，由馬來西亞華橋開設，所有湯底及配料都好有風味。招牌娘惹喇沙湯加入約20種香料，如南薑、香茅及班蘭葉等，未食已經聞到陣陣香氣，因為係正宗嘅關係味道都幾辣㗎～泰式椰子雞湯加咗椰奶同椰青，香濃又creamy，帶有淡淡椰子清香，雞肉都好嫩滑。配料就推介手打九雲丸，入面有紅咖喱鯪魚肉丸同馬拉盞蝦肉丸，口感扎實，香料味較重。

泰式+懷舊港式風 起鍋

圖: lastbitematters

一間泰式+懷舊港式風嘅火鍋店，一去到餐廳門口已經會見到掛咗好多七彩燈籠！湯底方面選擇好多，有東南亞特色嘅如香茅清酒煮蜆湯底同龍蝦冬蔭公湯都好吸睛，前者用咗半斤蜆肉熬成，味道好鮮甜，加上淡淡嘅酒香同香茅味道，食前真係要飲返碗；後者就酸酸辣辣好開胃，龍蝦嘅鮮甜滲埋落湯底又添一份層次。醬料區都好多款式揀，包括東南亞地區常用嘅香料如青檸、南薑、金不換同檸檬葉等，好地道。

文: Yanica