今年年頭嘅時候，龍蝦包突然成為大熱嘅美食，喺Facebook同IG都曾經有過一段洗板嘅日子。靜返一排之後，近呢幾個月又有幾間龍蝦包餐廳相繼開張或者推出呢樣嘢食，而叫得龍蝦包，當然龍蝦同包都咁重要啦，嚟個大比拼先：
Day and Nite by Master Kama
位於旺角嘅呢間餐廳，以龍蝦做主打菜式，當然就都有龍蝦包食啦，仲會連埋薯條、蕃薯條、沙律一齊上添。麵包搽完牛油之後烤到兩邊都金黃色晒，然後一層龍蝦一層火箭菜再一層龍蝦咁夾入中間，唧埋混入巴西葉嘅自家製沙律醬就大功告成。龍蝦係用加拿大波士頓龍蝦，另外仲有兜檸檬牛油醬可以點，不過，加完之後其實分別唔太大，科科。
龍蝦：***
包：****
價錢：$188
未開張已經引起大眾興趣嘅呢個水產巿場，入面有一檔龍蝦包專屬檔口，由名人黃婉曼負責經營。龍蝦包有全個同半個揀，自家製嘅法包都可以揀要硬定要軟，裡頭就夾滿新鮮蔬菜同龍蝦肉，賣相係幾吸引嘅，啲龍蝦肉都好彈牙。
龍蝦：****
包：**
價錢：半個$98，全個$168
Hungry Lobster
開喺登龍街嘅呢間餐廳，麵包係法國奶油麵包，都幾軟熟，而淨龍蝦肉大約重300克，用檸檬牛油醬汁嚟醃製，烤焗完之後牛油味都幾出，龍蝦肉都好新鮮，不過份量就細咗少少，唔多夠喉囉。
龍蝦：***
包：***
價錢：$138
HMV Bar & Restaurant
係呀，HMV都有龍蝦包食，不過係期間限定嚟，去到今年12月31號就冇㗎喇。呢度嘅龍蝦包聽落好鬼吸引，係活龍蝦海膽法國牛油軟麵包嚟㗎！麵包除咗夾住龍蝦肉同海膽之外，仲搽咗自家製嘅蛋黃醬同藏紅花末，鮮味中帶甘香。提多句，每日限量廿份㗎咋。
龍蝦：****
包：***
價錢：$188
D. H. Crab
呢間喺鰂魚涌專做龍蝦包嘅小店，臥虎藏龍，外籍店主以前係漁船嘅大廚嚟，處理海鮮有豐富嘅經驗。餐廳嘅龍蝦嚟自美國緬因州，爽口彈牙。佢哋嘅包都做得幾香口，烘過嘅邊好脆，包身就好軟熟，除咗有好香嘅牛油味之外，同時亦都有酸酸咪咪嘅檸檬汁同香草味。單點只係90蚊，算係咁多間龍蝦包餐廳之中比較平嘅一間。
龍蝦：****
包：*****
單點：$90
文：Kar
各款食物大比拼：
秋冬天，番薯天 5大蕃薯味零食大比拼
特色朱古力沖劑 麥提莎 VS m&m’s大比拼
便利店冰品比拼 榴槤雪米糍最吸引
隨時接收最新資訊
讚好OpenRice專頁！