又到每月數榜時間，要喺同行餐廳中突圍而出，獲得大眾好評，用心製作食物就梗啦，另外，創新嘅諗法都好重要架。今次上榜嘅餐廳，就有唔少特別嘅菜式配搭，好似雞皮餃子、芒果魯肉飯同麻辣牛肉燒賣等。
第10位 直燒和牛商店（*新上榜）
圖：主打熱石石燒和牛嘅呢間燒肉店，最抵玩係有得任食吉列牛脷，可以無限追加！一碟牛脷本身已經圍滿成隻碟咁好壯觀，每邊輕輕燒一燒就食得，肉質軟嫩。另外推介雞皮餃子，用脆卜卜嘅雞皮包住肉碎，特別酥脆。
第9位 麵賜園（*新上榜） 
圖：呢間café嘅特別，食港式牛筋牛腩麵食，但又有高質本地焙烘咖啡，完全好似冇關係嘅兩樣嘢又夾得埋一齊喎。去到唔想揀就嗌牛隊長湯麵啦，一次過食晒4款唔同牛嘅部位，包括牛肚、牛筋、牛腩同澳洲和牛封門柳。鮮牛骨湯底用咗成幾十斤牛骨去熬6個鐘架，仲加埋腩肉同藥材，唔係邊得嚟咁濃味，兼自帶甜香？
第8位 Follow（*新上榜）
圖：木系裝潢嘅西餐廳係有啲feel嘅，入到去見到枱枱都有碟搶晒火嘅德國火焰豬手，當然都唔可以執輸啦。店員會喺客人面前即席澆酒點火燒豬手，記得準備好boomerang了。燒完即食，皮脆肉厚。另外有道幾特別嘅配搭：酸奶忌廉封門柳手工闊條麵，creamy得嚟帶微酸，口感豐富。
訂座預付套餐：意式情迷火焰豬手2人餐 86折 (按此預訂)
第7位 辛手村（*新上榜）
圖：旺角川式串燒干鍋店，夾埋有30幾款川式同日式川燒揀，多數都係辣辣地嘅，辛燒魚腐串係推介， 仲有日式燒鰻魚，兩串都勁香。干鍋可以自選幾款食材，不過怕辣嘅朋友仔就要慎重考慮下，麻辣味都幾刺激，就算溝埋咗黑松露嘅麻辣黑松露干鍋，松露嘅香味依然唔能夠蓋掩到川辣嘅感覺，但嗜辣嘅朋友仔就會食得好過癮。
第6位 啖啖燕窩（*新上榜）
圖： 觀塘呢間養生燉品店近期人氣急升，有多款燕窩同其他養生甜品供應。主打嘅雪燕可以配搭唔同嘅生果，8月盛夏最受歡迎就梗係限量嘅日本山梨縣水蜜桃，清甜可口。花膠仲有得揀要麻辣版，過足口癮。
第5位 La Moo Moo' s Steak and Fries
圖：呢間扒房嘅選擇唔多，但就係夠精夠專。個個去親都實揀安格斯肉眼扒，大大份又Juicy，牛肉味又濃，牛魔王表示滿意。而且跟配嘅幼身薯條仲可以無限encore，非常抵食。
第4位 井巷子 by 鋒膳（*新上榜）
圖：又一間辣辣川菜上榜，佢哋嘅招牌菜係成都青湯水煮魚，用上4種唔同辣椒製作，麻香強烈。片皮鴨亦係必食之列，皮香肉嫩，最特別係會加入金奇異果同哈密瓜，油膩感即刻輕咗。麻婆嫩豆腐伴炸饅頭又係索晒啲辣汁之後，慢慢享受嗰份刺激感嘅菜式，每款菜式都花上心思創作，絕對值得入圍。
第3位 舍利鮨
圖：廚師發辦係近年冇得去日本後，深受港人擁戴嘅餐廳類型。呢間喺元朗，裝修充滿日本特色，座位闊落，師傅仲會好細心咁同客人講解菜式同交流，氣氛相當唔錯。刺身、壽司等食材新鮮，特別一提呢度有一夜干香魚，肉質有彈性。
第2位 壹.01（*新上榜）
圖：台灣菜必食魯肉飯，呢間啲魯肉飯就夠晒特別，加埋芒果落去變咗芒果魯肉飯，一甜一鹹但你估唔到又幾夾，清甜嘅芒果有助中和返重口味嘅肉香，愈食愈開胃。小食不妨揀拉絲芝士火腿蛋餅，分分鐘有驚喜畀到你！
第1位 龍點心
圖：今時今日，創意真係好重要。榜首呢間點心店，就係憑創意上位。將傳統點心重新包裝，燒賣變龍蝦汁墨魚燒賣同麻辣牛肉燒賣、腸粉變咗粉紅色，蝦餃都可以加酸菜魚，吸睛又開胃。另外有個豆腐布丁都好得意，淋上熱情果醬，酸甜有致。
文：Kar
