近年大家去麵包店可能都係排隊買布甸包或者麻糬波波，其實除咗幾間名店之外，香港亦有唔少街坊麵包店有創意口味嘅麵包。今次開飯仔就幫大家精選其中八間，跟住呢份指南就可以由甜嘅布甸包食到鹹嘅燒賣包！
新口味布甸包
芋泥布丁包 初麥手作烘焙（北角）呢間5月新開嘅手作烘焙麵包店開咗無耐就日賣過百個，當中熱賣No.1就係關注組力推嘅芋泥布丁包！麵包外脆內煙韌，布丁軟滑有流心，芋泥更係綿滑又保留部分顆粒感。想買嘅留意返出爐時間會係下晝3:30同6:00，每人限買四個。
圖: Joannakawai
栗子麻薯/紫米黑糖麻薯布甸包 文化烘焙（西貢/黃大仙）
呢間西貢必食嘅麵包店舊年開到去黃大仙，大家想食就更方便。麵包選擇多元化，最驚喜嘅係有栗子麻糬布甸包同紫米黑糖麻糬布甸包！前者頂層有細滑軟綿嘅栗子蓉，後者就加咗粒粒軟糯嘅紫米，加埋麻糬好啱煙韌控呀。另外小店亦有Pizza，熱辣辣食特別好味。
圖: eatisfun23
焦糖燉蛋/Tiramisu軟包 揉然地（紅磡）
雖然小店幫呢兩款包改名為Creme Brûlée Soft Bun同Tiramisu Soft Bun，不過相信都係以布甸包為藍本，餡料唔同而且將法包改為軟包。Creme Brûlée Soft Bun顧名思義上面係Creme Brûlée，焦糖味香。Tiramisu Soft Bun嘅可可同咖啡香都幾出，略嫌唔夠酒味啊。
圖:
爆漿麵包推介
冰心麻糬包 和氣包店（鰂魚涌）今年2月新開嘅港式麵包店，有多款傳統糕點同創意麵包選擇。新派嘅首推冰心麻糬包！外層係麻糬波波，裡面係唔同口味嘅忌廉餡，伯爵茶香清新，士多啤梨酸酸甜甜，朱古力咖啡甜味得宜。忌廉偏港式風格比較厚重，可以試下雪凍嚟食，會有雪糕口感。
圖: 德式炸包 理想餅店（新蒲崗）
睇落好似Doughnut咁漲卜卜又爆餡嘅係呢間人氣店嘅德式炸包，雖然因為即叫即炸要等大約15分鐘，但依然有唔少人排隊。其中一個原因係口味夠多，包括奶醬、阿華田、金莎朱古力、肉桂蘋果甚至係貓山王榴槤！炸包表面會有砂糖，甜就甜啲但口感都豐富啲。
圖: foodiechans
焦糖拉芝泡芙 至善餅屋（將軍澳）
將軍澳呢間麵包店不時推出新品，好似焦糖布丁泡芙，原味布丁泡芙，同非常IG-able嘅焦糖拉芝泡芙！顧名思義外層係香脆嘅焦糖泡芙，裡面係有拉絲效果嘅芝士餡，好啱芝士控。麻糬波波都可以一試，$5/件又夠煙韌。
圖:
特色口味鹹包
芫荽菠蘿包 天天烘焙（西環）芫荽黨黨員就唔可以錯過呢個芫荽菠蘿包啦，雖然對Die Hard芫荽控嚟講可能會覺得芫荽味唔夠濃，亦有食評指脆皮比起菠蘿包更似墨西哥包。不過估唔到芫荽同甜嘅酥皮原來又幾夾，而且麵包口感鬆軟。另一推介係黑糖糕，煙韌香甜。
圖: 魚肉/雞肉燒賣芝士包 桂悅坊（荃灣）
呢間麵包店就要召喚燒賣關注組組員啦，皆因呢間喺荃灣有兩間分店嘅麵包店有七味芝士魚肉燒賣包同芝士雞肉燒賣包！七味芝士魚肉燒賣包嘅燒賣口感較為軟腍，加埋七味粉都幾惹味；芝士雞肉燒賣包就食得出雞肉口感，而且同芝士都幾夾。結論係可以一試。
圖: 
文：Cathy.H