銅鑼灣最近開咗間鰻魚控值得去試嘅日本餐廳！主打日本鰻魚，全部即叫即燒，鰻魚丼最平$68份，原條約170g嘅蒲燒鰻魚丼都係$98仲唔使加一呀。再豪啲有三重丼，想特別啲又有鰻魚飯堡。最正嘅係所有鰻魚丼都可以加高湯自己DIY茶漬飯，二食感覺更抵！
 

鰻工房店如其名主打鰻魚，日本鰻魚會按時令挑選最好嘅出產地。有各款鰻魚丼同鰻魚小食選擇，難怪一入舖頭已經聞到陣陣燒鰻魚嘅香氣。
 

原條蒲燒鰻魚丼（$98，轉套餐+$30）

最受歡迎嘅一款鰻魚丼，每條鰻魚約170g重，加醬汁喺爐上面燒至皮脆肉香再切成四件方便食用。鰻魚肉唔算非常厚，勝在口感結實，而且燒汁香甜，送飯一流！飯亦特別加上紫菜、自家製蛋絲，絕對夠香口。
 

所有主食都可以加$30轉成套餐，包括溫泉蛋、鹹菜、鰻魚肝白貝湯同玄米茶。鰻魚肝白貝湯更加特別用鰻魚骨、魚頭、魚肝加白貝熬成，味道清甜。
 

而所有丼飯都有二食法：餐廳建議食剩差唔多三分之一嘅時候，請店員畀一碗熱昆布高湯，將鰻魚同飯倒入去，再按自己口味加入白芝麻同紫菜絲，就係鰻魚茶漬飯啦！昆布高湯清澈，帶淡淡鮮味，可以令味道濃郁蒲燒鰻魚無咁膩。
 

三重鰻魚丼（$198）

三重鰻魚係指一份有齊穴子、白燒生鰻魚，同蒲燒鰻魚三款，建議按返呢個順序由淡味食到濃味。穴子香氣淡雅而且無泥味。白燒生鰻魚即係無加燒汁從生燒至熟，鰻魚皮特別香脆而且脂香突出，係最有驚喜嘅一款。蒲燒鰻魚就最香最惹味。
 

 

鰻魚飯堡（$78）

特別啲嘅有呢份飯堡，飯本身已經有調味再燒香，加上牛油生菜、蒲燒鰻魚、芝士同雞蛋，睇落細細份但滿足度不減。餐廳仲好貼心咁畀埋兩塊紫菜大家可以包住飯堡食，就唔怕食到成枱都係啦。燒過嘅飯外脆內糯，口感有啲似燒飯糰，而鰻魚同芝士嘅香味又好夾。
 

鰻魚芝士玉子燒（$68）

玉子燒裡面係半融芝士同蒲燒鰻魚，玉子燒嘅淡淡甜味可以襯托鰻魚嘅蒲燒香味，加埋芝士味道就更加豐富！而且玉子燒熟得啱啱好，嫩滑多汁。
 

鰻工房
地址：銅鑼灣謝斐道468號百達中心地下D號舖

文、相、片：Cathy