拉麵控有新店可以去試啦！旺角呢間拉麵店由上年開立食燒肉店嘅藝人李泳豪創立，主角同樣係日本直送和牛，新店就變成配雞白湯、濃蝦湯等不同拉麵同沾麵，口味多變而且每款湯底都用料十足。
 

阿久根和牛拉麵屋唔同坊間其他拉麵店，配料特別選用A4和牛西冷，皆因店主李泳豪鍾意食牛，繼阿久根和牛立燒店之後，拉麵都要同和牛有關！不過唔同嘅係燒肉店會用油花較多嘅A5等級，沾麵同拉麵為咗令口味平衡，就揀脂肪少啲但同樣充滿肉香嘅A4等級。
 

慢煮A4和牛·雞白湯沾麵（$128）

西冷和牛醃製後低溫慢煮八小時，約兩至三成熟後封四面肉汁再以煨日式叉燒汁，所以食落非常嫩滑Juicy，有入口即溶感而肉味濃郁，略嫌筋比較多。雞白湯就用日本鹿兒島走地薩摩雞加少量豬骨熬成，奶白色沾湯濃稠香滑。
 

將麵條浸落熱辣辣雞白湯中，因為雞湯夠濃所以夠掛湯。如果係食唔慣濃味嘅朋友，可以選擇加少少帶酸嘅昆布醋，或者食到中間請師傅加入魚介清湯，鹹味都會減低變得更易入口。沾麵用嘅麵條比較粗身，口感介乎油面同意大利面中間，比較實而滑溜。
 

香煎虎蝦·濃蝦湯沾麵（$98）

其他口味依然落重本！蝦湯用咗兩款唔同嘅蝦熬足九個鐘，而且先炒過帶出味道，聞起嚟鮮味自然雙倍濃郁。沾湯加上櫻花蝦，沾麵底亦加上餐廳自製蝦油，令成碗沾麵蝦香十足！
 

虎蝦比手掌更長，煎香後啖啖蝦香口感彈牙。其他配料包括有糖心蛋、木耳、大蔥、筍、紫菜，糖心蛋選用可以生食嘅日本雞蛋，用兩日醃至入味，醬油味香而唔死鹹，係一大加分位。
 

 

灸燒豚肉·濃骨湯拉麵（$68）

湯底用豬骨加少少雞腳熬成，有豬骨香但比坊間一般嘅豚骨湯清，唔會食兩啖就覺得太濃或者太鹹。豚肉灸燒過後多咗一份火灸香味，肉質偏瘦而唔柴。
 

和牛餃子（$68/3件）

日式拉麵店中又點少得餃子呢，而係呢間主打和牛嘅拉麵屋中，餃子亦唔係普通嘅豬肉餡，而係A4和牛餡！煎至外脆內Juicy，牛肉香突出。
 

拉麵屋佔地唔算大，但勝在唔會太逼狹，坐喺吧枱仲可以欣賞到師傅烹調過程，增加互動。而且仲有木牌畀大家寫低願望許願，係唔可以錯過嘅打卡位！
 

阿久根和牛拉麵屋
地址：旺角廣華街13號廣輝大廈地下1號舖

文：Cathy
相、片：Tom Li