Chef's Stage Kitchen (荃灣/元朗)
Chef’s Stage Kitchen由三位擁有逾15年豐富經驗又創意滿瀉嘅西廚創立。過去幾年憑著他們過去幾年對食物嘅熱忱和堅持，餐廳由元朗一家只有10多個座位嘅小店，搖身一變成擁有元朗地標式餐廳，更係「D．PARK愉景新城」開設分店! 餐廳秉持一貫作風，一直堅持食物係世界各地精心挑選新鮮進口食材，以精緻手藝打造酒店級西餐滋味，供應多款性價比高嘅西式精選美饌，以高質美食嚟滿足食客嘅味蕾！
新鮮空運海鮮拼盤 (Seafood Platter)
兩位用或六位用嘅海鮮拼盤非常豐富，用料非常新鮮，包括法國合作蠔場直送号生蠔、海螺、阿根廷紅蝦、青口同加拿大海膽，一次過滿足多款海鮮慾望，海鮮迷必試！
初榨純橄欖油蒜香白酒煮紐西蘭海鑽蜆扁意粉 (Linguine Congole)
意粉煮到啱啱好，口感彈牙，超香橄欖油味，配上比亞洲一帶水域品種更鮮甜、更厚嘅紐西蘭空運到港海鑽蜆，用上微辣嘅香料帶出蜆肉嘅鮮味，必食之選！
保雲蘇焗羊西冷配紫蘇蜜糖醬 (Provencal Lamb Sirloin)
用上香草保雲蘇焗羊架傳統焗法，做到肉嫩多汁，喺羊架上加上麵包糠、迷迭香、羅勒等香料，令羊架顯得格外清新，再伴以香草露絲瑪莉燒薯仔、 美國鮮蘆筍、燒蕃茄一齊食，感覺好refreshing！
炭燒穀飼澳洲肉眼牛扒 (8安士) 配香草牛油焗波士頓龍蝦尾 (1隻) (Lobster Tail & Australian Beef Rib Eye (8 OZ) )
份量十足嘅主菜，足足八安士嘅穀飼澳洲肉眼牛扒燒到啱啱好，入口有微微炭香，充滿肉汁同肉味，再配埋勁香香草牛油味又超鮮甜嘅波士頓大大隻龍蝦味，簡直係海陸之選！
德國香脆鹹豬手 (Pork Knuckle)
豬手炸到皮脆肉嫩，鹹香惹味，可以沾蜜糖芥末醬一齊食增加風味，配薯仔沙律，再佐以味道正宗嘅酸椰菜食有助消化同減輕肉膩感， 最適合同三五知己一齊分享！
申子居酒屋 (旺角)
申子居酒屋位於競爭激烈嘅旺角黑布街，所以老闆唸咗唔少Gimmic主意吸引客人，既讓客人用水晶板、岩石板DIY燒肉，又有自製甜品，更提供外賣餐點同Cocktail，打破一貫居酒屋格局！主廚更曾到訪大阪老字號居酒屋學藝一個月，至今師傅仲會每月都港視察，對食材處理同食物品質極為執着！所以菜式都堅持用新鮮日本直送材料，部分菜式更是自家研製，係旺角難得有姿勢又有實際嘅居酒屋! 鐘意食日本菜嘅朋友不妨試試!
獨門自創吉列千層芝士豚肉，特別挑選日本栗飼豚腩肉，豚肉肥瘦適中。豬腩肉捲八層，加入芝士蘸粉炸，質感外脆內軟，芝士味濃，更有拉絲效果，配埋沙律醬同豬扒汁一齊食，酸酸甜甜非常開胃！
蓬鬆中玉子
蛋包圍住玉子同芝士，切開有流心蛋汁流出，超滑超香! 配埋沙律醬、燒汁同蔥花進食蛋味更突出，味道更日式！
一藏酒場 (灣仔)
一藏酒場位於灣仔築地‧山貴水產市場，係一間主打日本清酒嘅居酒屋，配以傳統日本酒肴-海鮮燒物，帶你進入仿如置身於日本嘅味覺之旅。酒場設計高貴典雅，場內所有清酒全部由日本直送！將真正地道嘅日式酒場體驗引入香港! 係三五知己吹水乾杯嘅好去處之地!
(人氣) 鬼地獄海鮮湯烏冬
世界上辣椒嘅辣度以「史高維爾辣度單位」嚟衡量辣椒素嘅濃度，世界上最辣嘅辣椒美國「卡羅萊納死神」辣椒有220萬度，而鬼地獄海鮮湯烏冬則有100萬度！(唔好睇少碗烏冬好似唔紅咁⋯⋯) 輕則淚水狂飆，重則火燒心！想試又怕辣嘅朋友仔不妨先試小辣或者走辣版本！
店長指定清酒Tasting Set
一set三杯50ml季節限定嘅日本清酒，美酒師會為每個客人精選適合嘅清酒，為女士推介較為輕盈易入口嘅、為男士及有preference客人推介較濃烈及特別嘅清酒，務求切合每個客人需要，飲過如果鍾意，仲可以一盒盒180ml咁散買走！
（期間限定) 德島県香魚爐端燒定食
用上被譽為日本最後清流-四國德島縣四萬十川嘅香魚，香魚肉質鮮嫩多汁，簡單咁抹上少少鹽巴烤，已經香味四溢！餸飯一流！
（期間限定) 愛媛県鯛魚配極鮮魚湯泡飯
以「魚之王樣」真鯛煮成，魚湯乳白色，賞味指數極高，米飯王者日本新潟米配上每日新鮮熬制熱辣辣嘅魚湯，簡單得嚟清甜十足！一吃就上癮！
（期間限定) 沖繩阿古豚角煮定食定食
以沖繩「夢幻之豬」阿古豬整成，降霜肉脂肪十分甘甜，入口即溶，肥而不膩！搭配流心溫泉蛋好夾！豚角仲有唔同程度嘅油份供容人選擇，非常貼心！
*以上圖片只供參考，所有食品以實物為準. 食品供應因餐廳而異
相、文：Tiffany