今個聖誕，HABITŪ同名模Amanda S合作，推出一系列法式聖誕甜品，每款賣相好有聖誕感覺，但甜品味道與眾不同，大部分材料均由法國運來，用料夠靚，味道自然加分，快啲睇下各款甜品賣相先！

獲名廚Ludovic Douteau指導嘅Amanda S喺早前舉行嘅傳媒預覽中，親自介紹聯乘甜品系列嘅靈感來源、甜品用料等等。

Amanda表示，佢好enjoy喺法國度過嘅聖誕節，喺暖暖火爐旁邊欣類窗外嘅白色雪景，從而構思出呢個白色聖誕概念。

呢個White Christmas Log Cake($688/個)，以香草意大利芝士蛋糕做base，再加入紅莓、歐洲酸櫻桃果凍及紅莓杏仁蛋白餅做內餡，口感好有層次。造型好似傳統嘅法式樹幹蛋糕，不過呢個白色版法式樹幹蛋糕睇落更有聖誕感。

因為紅莓、歐洲酸櫻桃果凍嘅關係，蛋糕味道酸酸甜甜，無一般蛋糕咁齋甜，食落清新啲！

如果怕食唔晒一整個白色樹幹蛋糕，大可以選擇呢款迷你版白色樹幹蛋糕，食落都係咁fresh，價錢為$52/件！

呢款Santa’s Chestnut Pound Cake以法式牛油蛋糕配以栗子醬、栗子蜜、比利時朱古力等材料，經典又好味。

紅莓朱古力榛子味曲奇Rudolph’s Biscuits都與別不同，特別用果仁磨成嘅麵粉，再加埋牛油、糖及紅莓去製作曲奇，味道充滿紅莓味道之餘仲滲出淡淡果仁香氣，價錢為$98/盒。

其他聖誕蛋糕

聖誕限定飲品

即日起，HABITŪ再次推出白松露栗子鮮奶咖啡($58/杯)及白松露栗子朱古力($58/杯)，外賣杯裝更附有白色翅膀，增添節日氣氛；堂食則跟送松露天使翼曲奇。

堂食節日大餐

HABITŪ亦為節日設計出幾款限定菜式，有煙火雞扁意粉配紅菜頭忌廉汁($128)、蜜糖聖誕蜜汁火腿拼松露啤梨薯配烤厚切新鮮菠蘿($168)、以色列無花果火箭菜沙津配草莓意大利陳醋($78)以及香煎比目魚扒拼開心果粒意大利青瓜麵配無花果陳醋($178)。供應期至2018年1月14日。

節日大餐一定要食甜品，尤其是呢個松露香橙焦糖布丁。

節慶到會菜式

除咗堂食，HABITŪ亦準備咗3款節慶到會menu，價錢由$1,988起，菜式有煙燻慢烤豬肋骨、香煎比目魚扒拼開心果粒意大利青瓜麵配無花果陳醋、威靈頓紅菜頭甜薯卷、自家煙熏三文魚、牛油果有機藜麥及羽衣甘藍凱薩沙律、香煎珍寶扇貝脆煙肉卷、海膽Avruga魚子醬卡邦尼意粉等等。而且餐廳仲包埋餐枱佈置服務，令你哋嘅party更有氣氛！供應期為2017年12月4日至2018年1月1日，客人須於派對前三日預訂。

有乜送禮之選？

HABITŪ有3款節日禮品set，有薑餅巨人曲奇嘅Warm Christmas($178)、有毛公仔同埋曲奇餅嘅Christmas with RABITU($298)以及以咖啡為主嘅Brewrista di HABITU($428)。

HABITŪ
地址：金鐘夏慤道10號和記大廈地下G22-27號舖

文：Joy