早兩個月先進駐金鐘嘅KiKi茶茶.米又有新搞作啦！襯住天地涼涼地，佢地推出一系列嘅新產品，包括六款秋冬特飲，六款新出嘅茶製甜品同埋三款新口味嘅KiKi麵，中意嚐鮮嘅為食貓要嚟試下！
秋冬特飲包括五款熱飲同一款凍飲，KiKi皇后私版黑茶($35)，混合嚟自台灣南投嘅紅玉紅茶同雲南普洱茶，會有淡淡天然肉桂同薄荷香，自家桂圓紅棗茶($32)同黑糖紅棗薑母茶($34)都係每日現煮，用咗台灣在地桂圓同紅棗，女士們冬季飲就最好。
中意杏仁嘅就要試下呢三款，手磨杏仁茶($32)杏仁味香濃，仲有美顏效果。焦糖堅果奶蓋杏仁茶($35)喺面層加咗焦糖堅果奶蓋，口感同味道都更豐富。想飲凍嘅就有手磨杏仁鮮奶加珍珠($43)，得呢款可以加唔同口味嘅珍珠，不過就只限外賣啦！
茶.米同時推出多款以「茶」為主題嘅甜品，伯爵戚風蛋糕配黑糖珍珠($68)，伯爵茶味忌廉係用法國忌廉打成，味道香濃。焙茶布丁拌黑糖珍珠好幼滑($38)，兩者都係用台灣嘅黑糖珍珠，好有咬口。綠茶提拉米蘇($68)以日本綠茶取代傳統可可粉，配埋意大利馬斯卡軟芝士，食落一啲都唔漏。KiKi烤茶泡芙($38)外皮酥脆，入面係香濃嘅鐵觀音忌廉，味道回甘。鳳梨青茶雪芭($48)用台灣青茶同新鮮菠蘿炮製而成，味道酸酸甜甜。白桃烏龍雪糕($48)有烏龍茶嘅甘香之餘，又帶有白桃嘅清香甜味。
飲KiKi茶當然唔少得食埋KiKi麵啦，今次特登搵咗日籍米芝蓮二星大廚小西充先生設計新口味，KiKi溫泉蛋肉味噌拌葱油太麵($118)用咗kiki陽春麵整，有淡淡蔥油香。KiKi咖喱牛肉湯麵($138)，咖喱香料味重，有少少辣，而且湯汁好杰身，每食一啖都濃濃咖哩味。KiKi胡麻棒棒雞拌小醋麵($118)用咗KiKi小醋麵造，微微酸味好開胃。
品牌自家創作咗四款唔同口味嘅珍珠。有好受歡迎嘅「黑糖珍珠」同「迷你芋圓」，仲有加入咗KiKi椒麻粉炮製嘅「川味珍珠」同埋中式涼茶口味「夏枯草珍珠」，咁特別要去試下！
地址: 金鐘金鐘道88號太古廣場1樓112號舖
文、相、片：Yanica