太興 (Closed)

大砂鍋黑椒豬手、蝦皇醬啫啫芥蘭苗、胡椒豬肚湯，兩個人三味餸都要二百幾埋單，依家出街食飯閒閒地要過百蚊，真係有點貴呢﹗冰鎮奶茶，鎮店之寶，冰鎮奶茶既始祖！質感滑溜溜，茶及奶既比例剛剛好，各有各精采，相互融和又唔會蓋過對方，先黎奶香，再有茶香隨之而來，味道香濃而細膩，好滿意！蝦皇醬啫啫芥蘭苗煲，蝦醬一炒起真係好香好香﹗熱騰騰一個大砂煲放上枱面，侍應即時係人面前兜兜撈撈，吱吱喳喳作響，勁有氣氛﹗芥蘭鮮嫩爽脆又多汁，裡面帶著天然菜蔬甜味，黏上蝦醬獨特既海鮮味，好食啊﹗可以添食。緊記要趁熱食，凍左有點咸呢，越凍越咸。砂鍋黑椒豬手，同樣要趁熱食，凍左會好鞋，會變硬添，仲會好咸添。熱食可口，在砂鍋中打滾，質感唔算太硬，黑椒微辣帶香，濃一點會更開心，欠了點蒜香。豬皮夠膠口，肉質堅挺啖啖肉，豬肉味道似現成咸豬手，並不是自家醃製而成，總括一試無妨，大中華最出色。我覺得都係德國食既正宗脆皮咸豬手最好食，外脆內嫩勁 Juicy，肉質滑溜似炆豬肉，豬肉味香濃，但暫時係香港未遇到 ﹗胡椒魚肚湯雞煲，新品種。天氣冷滾住食最正，好鬼暖笠笠﹗滾一滾神仙企唔穩。啜啖靚湯，雞件滑魚肚棉餚出香甜濃郁湯底，Good ﹗當然連吞