蘭香茶餐廳 (Moved) New Location

放假響荃灣做完私人事務，兩點幾入黎坐低食個Late lunch......凍奶茶，好夠茶味，叫左少甜都略甜，下次想正常D可以叫少少甜。 蘭香炒飯，用得舖頭名做食物，通常都係招牌菜(一廂情願)，點知一放低，碟飯個賣相真係好有小店風格(掩面)。響無預期下，碟炒飯食落又反而有驚喜，飯粒分明(基本野黎姐)，叉燒同蛋味好出(好怕D炒飯因為就住成本而整到成碟都係火腿)，我唔知訂入黎食炒飯姐，我食完呢個飯，果刻想像到，呢度D蛋治應該幾出色，唔會差得過隔離無開門果間。($50連湯飲品凍飲加$3)例湯，微暖無味，下晝兩點幾，呢樣野就唔好太高要求啦。

好耐未試過咁早返工 (其實都係8:30啫，嘻嘻)，安排好工作，就走去食早餐。見嘉樂未開，就自然地走咗去隔離嘅蘭香。叫咗一份早餐，有蛋治、火腿通粉同一杯飲品。蛋治先到，麵飽比一般茶餐廳略厚，足有半吋咁厚，蠻算軟熟，牛油則不多，蛋嘅份量亦唔多，係一般嘅煎蛋，蛋味唔濃，普普通通。火腿通粉，湯底冇嘜味，好淡，好彩有支黑椒係旁邊，可彌補不足，通粉質地偏腍，咬感唔夠，反而火腿嘅味道幾濃，帶有甜味，可惜冇切絲，若能切絲，一來比較易入口，二來可以調味，一舉兩得。至於凍奶茶，有茶香，但唔濃，比較簿身，應該可以處理得更好。埋單$26。