民華餐廳 (Closed)

呢間民華好光猛，又幾新淨。有湯粉麫，有碟頭飯，有蒸飯，又有茶餐；搞到試完一樣，再蒞試第二樣，暫時試過嘅味道OK份量足。一、煎蛋牛肉/鳳瓜排骨飯($27)：雖然味道一般，牛肉質感似點心牛肉球，鳳瓜排骨味道又係似點心鳳瓜排骨，但係佢平，性價比高，仲可以加十文要碟菜。二、魚蛋河($28)：以為得魚旦？年輕人，你實在太年輕了，有魚旦，魚片，魚角，爽口彈牙；仲有兩條菜；最重要係佢有非常好食嘅 炸 魚 皮三、咖哩牛腩飯($47)：夠香而不過速，夠濃可以撈飯，牛腩唔靭而不過坺。

民華餐廳喺堅尼地城地鐵站一出就係, 不過b出口會比較近啲, openrice寫c出口會行遠咗少少。 餐廳門面比較細好容易會錯過咗， 不過入面裝修幾靚， 估唔到港式茶餐廳都可以裝修到好舒服， 好企理同好乾淨， 餐廳嘅便有卡座亦都有圓枱唔會逼逼澀澀。今日叫咗啲嘢食，常餐叫咗火腿通粉，餐肉炒蛋配煉奶多，同埋熱咖啡。火腿通粉勁大碗，而且啲雞湯都好濃， 濃得嚟又唔會過鹹， 又唔會淡茂茂淨係得滾水。餐肉炒蛋個蛋非常滑， 餐肉係厚切嘅，呢一點非常好。煉奶多即叫即烘熱辣辣，杯咖啡雖然唔係即磨嘅但係都非常濃郁。而媽媽就叫咗個牛丸拼墨丸米線， 牛丸原來有五粒非常多， 墨丸非常彈牙， 米線嘅份量多到阿媽都食唔曬。另外我哋仲叫咗個咖哩牛腩飯， 咖哩牛腩飯咖哩汁非常濃味， 而且牛腩同牛筋嘅份量都好多， 最正嘅係碗飯都非常大碗， 上高仲有隻煎蛋㖭， 非常不錯。最後我哋仲叫咗個雞扎， 繼續非常多料，另外芋頭有兩嚿，仲有魚肚同雞肉， 同佢酒樓食點心嘅價錢差唔多，係呢到食又唔使俾茶錢，正！

琴日星期六同老公豬去行山，做運動前嚟到呢間新開嘅茶餐廳醫肚。食lunch時段全場滿座，鋪面光猛，整潔企理，坐得舒服，員工態度不錯。我叫咗常餐鮮茄牛肉通粉，通粉大大碗，個湯超濃，有大大粒番茄同牛肉，真係好好味，絕對係有誠意之作。個餐配埋厚多士加炒蛋加腸仔，厚多士好脆，炒蛋好滑，包埋杯熱奶茶都只係$38 ，可以話係平靚正。之後如果想食常餐，都一定會諗起幫襯民華！老公豬就揀咗咖喱牛腩飯，我試咗少少。個咖喱好香又唔太辣，好開胃，用嚟撈飯一流。牛腩入邊仲有我至愛嘅牛筋，老公豬讓左件牛筋俾我食，好腍好入味，之後先發現原來仲有一至兩件牛筋，牛腩都有幾件，絕不馬虎！食到一半先留意到原來呢間茶餐廳仲有中式點心同蒸飯賣，既然黎到我忍唔住要叫多個排骨飯兩個人分黎試吓， 20幾蚊響邊度搵！排骨汁入咗啲飯度好香，又唔似啲酒樓咁油，排骨肥瘦適中，係有水準之作！我同老公豬都好喜歡去茶餐廳，呢間茶餐廳可以話係我心目中頭幾位嘅餐廳，佢嘅食物質素屬高水平，環境衛生舒適，員工態度有禮，上餐亦很快，價錢比想像中便宜，之後一定會再嚟幫襯！