ChaTraMue Cafe

Open Now

Now Closed

好幾個住沙田區嘅朋友都推介過叫我哋去呢間位於沙田嘅ChaTraMue Cafe ，週末專登去探訪一下，順便行吓街。其實真係好舒適嘅地方，環境俾人一個好舒適輕鬆，泰國feel的 Cafe，而食物質素真係好唔錯，價錢又唔貴。ChaTraMue 泰茶有幾好飲就人人都知，試過 Cafe 嘅嘢食，有驚喜所以要幫手寫下咁有心機做飲食嘅店舖。 安格斯牛肉湯河超好味，牛肉湯真材實料，安格斯牛肉質素極高，入口嫩滑，但咁高質嘅一碗牛河都只係$88。 泰式滷水豬髀飯啲豬髀已經炆到好腍好入味，配上少少甜酸菜加蛋，好開胃。 泰式海南雞飯，雞肉嫩滑可口，有雞味，又大大份，啲自家雞醬汁好特別，絕配。泰式海南雞廚師事先已經細心嘅起咗骨食起嚟啖啖肉，好正。我哋再加多咗一份泰茶疏乎厘pancake，超好食，我哋個個掛住搶食，唔記得影相，但真係要推介一下呢度嘅甜品真係好正！

沙田新城市廣場開咗呢間ChaTraMue Cafe 一直都有朋友讚好，但直至今日做完gym同幾個朋友一於去試吓。 餐牌簡簡單單一睇落去價錢都唔算貴。泰茶有幾好飲就不用介紹。 我叫咗個安格斯牛肉湯河, 班friend分別叫咗一個香葉肉碎飯, 豬頸肉飯同泰式海南雞飯。之後再加咗幾個甜品，泰茶巴斯克芝士蛋糕椰子蛋糕同埋 Waffle. 安格斯牛肉湯河，牛肉有牛肉味，入口嫩滑，湯底清甜，係好食㗎，只係$88。班friends 嘅海南雞飯都好味，海南雞做得好，高質雞肉，入口嫩滑有雞味，香米飯都係優質香味入口軟熟。個friend話佢個燒豬頸肉飯非常好味，豬頸肉醃得入味，燒得又好香口，佢叫我要大大力去讚吓佢個點豬頸肉醬汁。 另一個朋友話個香葉肉碎飯炒得都非常香口好有泰國feel。佢哋主食質素高班，大部分都係$88，抵食。甜品真係有驚喜，巴斯克芝士蛋糕茶味同芝士味非常平衡，鍾意食芝士蛋糕嘅人肯定鍾意。但係驚喜嘅係佢嘅椰子蛋糕有濃郁嘅椰香味及忌廉香味，蛋糕軟熟幼滑加上一絲絲椰子好有咬口，呢個係我個人最喜愛嘅！另外一客嘅Waffle新鮮整出嚟好有蛋香味，食咗一啖係會唔停口。店舖環境優雅乾乾淨淨員工都好有禮

新城市廣場人流稀疏，阿妹喺加拿大返嚟，問點解香港而家搞成咁。我哋途經呢間 ChaTraMue Cafe, 阿妹話裝修得幾靚, 同阿妹、妹夫坐低食吓嘢。佢有張poster貼咗個牛肉湯河，應該係招牌菜，所以我叫左試吓，湯底濃但清甜，牛肉幼滑有牛味，不愧係安格斯牛，加上少少配菜，例如牙菜、新鮮紅蔥片、乾蔥碎，令到整碗牛肉湯河很有層次感，非常可口。妹夫叫咗個泰式滷水豬髀飯，滷水味道溫和、豬髀已經炆到好腍，感覺充滿骨膠原，配上小小甜酸菜在旁，仲有半隻滷水蛋，都係$88，抵食呀！阿妹叫咗碟豬頸肉飯，豬頸肉好入味，非常之有泰式感覺，燒到香香地，要來點豬頸肉嗰碟醬汁，更加有驚喜，微微辣，但係好有層次感，豬頸肉點咗之後更加好食。我哋再叫多一件巴斯克芝士蛋糕，三個人分。芝士味好香，但又不失又泰茶味，呢個甜品非常成功。我哋食得滿足，整間店舖環境乾淨，服務態度良好，氛圍也好，我哋會再嚟，值得推薦。安格斯牛肉湯河 泰茶巴斯克芝士蛋糕

我coweater 試完呢度嘅牛肉湯河真係著迷，今日同呀媽女友再試下其他嘢食。我再點安格斯牛肉湯河，真係冇得輸，湯味非常鮮甜，牛肉入口幼嫩，好正。女友點咗個泰式肉碎玉子湯粉絲，雞湯底都係非常鮮甜，唔係啲乜乜化學湯，味精味重，食完口渴嗰種，配搭有豬肉碎，少少芽菜及通菜，成碗粉絲湯好開胃好味。阿媽碟海南雞飯都好唔錯，好有雞味，入口軟滑，要特別推介係佢嗰碟海南雞嘅雞汁，好惹味好開胃。佢哋啲甜品好似幾出名，嚟到梗係要試吓啦。叫咗一件椰子蛋糕，表面鋪滿粗粗椰子絲，口感非常好，食落椰子cream味好重，而蛋糕又好幼滑。另外一件係牛乳蛋糕，牛乳味非常濃厚，好好味，表面鋪上一些杏仁碎片，有着濃郁嘅牛乳同忌廉味，好明顯佢哋唔係用啲cheap cheap嘅植物忌廉，非常有心做蛋糕。女朋友話佢裏面嘅唔係海綿蛋糕，我淨係知道佢哋好幼滑，甜品的確係好出色。三個人叫咗三杯嘢飲平均每人約 $120-150。以後我多咗一個最愛美食嘅地方，呢度嘢食性價比高，質素好環境舒服又有得泊車，極力推介俾鍾意去性價比高餐廳嘅朋友！