映水芙蓉 (海運大廈) (Closed)

我尋日打電話book位食飯，聽電話既小姐好有禮貌同埋入面既服務員都好細心，因為我地食晚飯既時候，我留意到serve我地位服務員幫我地斟茶既時候滴左一滴水係枱面，佢都即刻第一時間拎張紙巾幫我地抹番乾個枱面！服務態度抵讚！ 另外，食物方面令我最驚喜既就係敲糖棒棒雞，個雞肉好嫩滑同埋個汁好惹味！ 下次再去既時候必定encore呢個前菜！

可能因為一早訂好枱, 所以被安排到一個無敵海景位, 未食野淨係見到個景都嬴晒。每人會先上一杯梨子酒, 淡淡梨香配vodka, 都幾易入口。 湄公魚好大鍋, 魚肉都嫩, 唔會太辣。螞蟻上樹好好食, 一上菜就聞到好香, 粉絲香脆可口。侍應會先上紅米飯, 再即場係上面淋好多蝦膏。蝦膏會一直係石鍋滾, 等到滾完有D凝固再食, 好香蝦膏味, 幾好食。墨魚餃賣相好靚, 但味道非常普通。擔擔麵麻辣香口, 麵條軟硬適中, 值得一試。呢個棒棒雞睇得又食得。侍應會即場用刀叉敲開中間既糖柱, 撈落雞度。食落真係幾惹味, 但我唔太食得辣, 呢個真係幾辣。蒜泥白肉應該係全晚最令我失望既菜式。唔係肥膏既部份真係全瘦肉,  D肉好鞋。辣汁冇乜蒜味, 完全稱唔上蒜泥白肉。炒椰菜好香, 幾好食, 都係微辣。最後會有朱古力送, 雖然係唔同口味, 但除左辣味同酒味較明顯之外, 其餘都只有朱古力味。雖然價錢唔平, 但有靚景又坐得舒服, 整體感覺都幾好。