馬泰

Open Now

Now Closed

睇過大家嘅食評之後，決定嚟呢間野度試吓，果然唔錯，我覺得好抵食，$110又食到無骨海南雞，又食到喇沙，又食到杏仁蝦餅，仲要飲埋馬來拉茶，馬來西亞泰國地道嘢食一次食晒，整體樣樣都好食好有水準，好食飽，大滿足！

今日黎左銅鑼灣，食tea食著馬泰呢間泰菜。以下午茶黎講，價錢唔算貴，份量大，保證飽，最啱晏小小出黎食晏既朋友仔。我地兩個人叫左一個無骨海南雞喇沙，同一個肉骨茶，另外跟餐叫左兩個小食炭燒豬頸肉同埋鳳爪沙律，另外飲品叫左椰沙冰同豆奶紅豆冰。鳳爪沙律率先上枱，份量係兩人份，酸酸辣辣既鳳爪為下午茶熱一熱身開一開個胃口。無骨海南雞喇沙好香，湯頭飲得出係真材實料，海南雞啖啖肉，配埋喇沙感覺好豐盛。肉骨茶飲落好養生，可能係因為有龍眼同杞子既關係，另外有4大舊排骨，同樣啖啖肉， 另外重有必備既豆卜同油條，將茶加落白飯當湯飯食又係另一種滋味。另一個小食炭燒豬頸肉，同樣好大碟，好香燒烤味。食完野飲埋杯餐飲真係好完滿。