聯發茶餐廳

Open Now

Now Closed

茶餐廳嚟講一入到去感覺算比一般茶記乾淨企理，伙記服務爽手又友善。食物比一般茶記加入少少新意，但亦會不失傳統，亦有心做好食物。法蘭西多士🍞睇落好厚身，四四方方好治癒😆，溫度微暖，所以唔會一上枱牛油溶到見唔到。基礎同普通港式西多士一樣，入面係粗粒花生醬餡，炸得都乾身香口，唔會油林林。炭火叉燒煎蛋飯🐷🍳🍚驟眼望落去叉燒比較瘦，但食落係比外觀好嘅，唔係半肥瘦個種油香軟林嘅叉燒，而係爽林嘅質地，有少少爽嘅筋同肉嘅纖維質感但唔會乾鞋，但就應該唔係炭火燒過，只係名係咁叫，因為睇落冇炭燒嘅焦脆邊同香氣🤨煎蛋煎得好靚仔👍🏻蛋白熟晒又好脆口，蛋黃流心😋甜豉油會另外比你按自己需要加，整體嚟講質素唔錯，但覺得飯稍為軟咗啲，粒粒分明啲會仲好🤔炸午餐肉配蛋黃醬午餐肉上灑上砂糖去中和午餐肉嘅鹹，佢嘅午餐肉本身唔會過鹹呢點唔錯，其實配上砂糖鹹鹹甜甜又有砂糖脆脆哋嘅口感再加埋蛋黃醬嘅油脂香同微酸係ok的，而且用嘅蛋黃醬質素都唔錯，但敗筆在於午餐唔夠脆身😮‍💨，如果午餐脆啲，同埋砂糖同蛋黃醬平均啲啲落午餐肉到/蛋白醬分開上比客點會比較好😬另外叫咗熱奶茶，正常質素，都幾好飲嘅。

今日我去咗九龍城侯王道既老字號茶餐廳-聯發茶餐廳食飯。呢間茶餐廳已經開咗好多年，係呢頭非常出名既一間餐廳。我同朋友叫咗乾炒黑椒牛肉意粉，炭火叉燒煎蛋飯同埋凍咖啡。我試左乾炒黑椒牛肉意粉，佢個味道好正，牛肉炒得香口，意粉又炒得岩岩好，有鑊氣。而且加咗好多黑椒，整個意粉幾惹味，好適合中意重口味既人。另外，朋友仲叫咗炭火叉燒煎蛋飯，飯煮得好香，叉燒有肥有瘦，肥瘦適中，煎蛋煮得剛好，蛋黃有少少流心，撈埋飯食味道好好。而且佢地叉燒蜜糖醬汁都好正，餐廳一啲都唔慳皮，成個飯都有汁，令整個飯更加香，朋友食慾大開即刻扒多兩啖飯。最後，我叫咗凍咖啡少奶，咖啡味濃郁得黎好舒服，亦唔似一般既茶餐廳咖啡會偏酸。總括而言，聯發茶餐廳俾我嘅食物印象幾好，佢地既份量都幾夠，對得住價錢，如果你平時少食茶餐廳又中意食炭火叉燒，呢間幾值得一試。