嚮和風料理

Open Now

Now Closed

放工一出地鐵必經既餐廳，超方便，見價錢都好親民，今晚黎幫襯下1）慢煮豬軟骨咖喱烏冬 （+醬汁蛋半隻）慢煮豬軟骨真係好腍，連軟骨都好腍，難怪係招牌菜。烏冬配埋咖喱汁，嚟一個撈烏冬，咖喱汁有少少辣，份外惹味。醬汁蛋係糖心蛋嚟，覺得比溫泉蛋更好，蛋味更香濃，好鍾意見到個蛋黃色係橙色嘅！2）慢煮豬軟骨烏冬（揀咗芝麻湯底）湯烏冬就比咖喱烏冬清淡啲，有啲湯濕吓個口，食落冇咁乾。3）10種野菜溫沙律第一次食溫野菜嘅沙律，芝麻沙律醬係另上嘅，非常好。所有菜都係烚熟咗嘅，蔬菜都好新鮮。真係有十種蔬菜：有粟米粒、西蘭花、椰菜花、紅蘿蔔、翠玉瓜、長豆、紫洋蔥、薯仔、南瓜片，同埋蕃茄仔！4）炸魷魚鬚、吉列炸蠔炸物係即叫即炸嘅，炸得鬆脆好乾身，上碟嘅時候候唔見好油，兩個人食嘅份量啱啱好！飲品方面，大家都叫咗檸檬可樂，初初以為係新鮮檸檬片加罐裝可樂，點知係嚟一罐現成嘅檸檬可樂，同想像係有啲落差嘅，但因為係未試過，有新鮮感，飲落都唔差。店舖有清新嘅日式裝修，坐得舒適，有卡位，服務有禮，仲唔收加一添！

嚮和風料理正正開係北角地鐵站隔離，地理位置非常方便。餐廳主打蛋包飯同烏冬，入面裝潢充滿和風特色。餐廳用QR code落單，上菜非常快，大約等咗十分鐘左右。- 烤雞咖喱烏冬雞扒烤得恰到好處，肉汁豐富。烏冬用左幼身既稻庭鳥冬，口感煙韌同好掛汁。日式咖喱汁唔會話太辣，另外仲有溏心蛋、大量蔬菜同粟米，非常豐富。- 脆豬滑蛋丼加慢煮豬軟骨吉列豬扒好大份幾乎覆蓋曬成個碗，即叫即炸非常香脆。另外洋蔥同滑蛋完美配合，軟糯既米飯吸收豬排同滑蛋既醬汁，令人停唔到口，佐飯一流。至於豬軟骨慢煮之後肉質非常軟稔，仲帶有淡淡嘅甜味，骨膠軟非常豐富，而且有兩大件非常抵食。- 芥末椒鹽豆腐炸粉好薄，入面豆腐好嫩滑，沾上芥末醬更美味。- 脆脆蒜香茄子外皮香脆，炸粉仍然咁薄，茄子上面灑上椒鹽粉後味道更香，旁邊仲有沙律菜。- 炸吉列蠔吉列蠔酥脆可口，入面好肥美，配埋特製醬汁更惹味。餐廳性價比真係高，兩道主菜包括咖喱烏冬同脆豬滑蛋丼好好食，小食都唔錯，絕對會再encore👍🏻