大戶屋

Open Now

Now Closed

游完水去搵食都較難，因為好多餐廳都落場，選擇唔多！上網搵到呢間日式食店無落場，入到地下大堂，有種好俗嘅香精味，真係好惡頂！唔該換咗佢！大堂一眼望見嘅𨋢都唔上5樓，要問大堂職員先知仲有一部比較隱蔽嘅𨋢上去！門口已經非常和式，店員比我哋坐一張靠窗嘅四人枱，好闊落！地方光猛乾淨！好靜好舒服！呢間以定食為主！大家各叫一個定食！燒厚切鹽麴牛舌飯（$108）牛脷比較厚，又比較韌，唔夠熱，好似大碗飯，一碗有晒沙律、牛脷、薯泥、白飯，沙律菜比較老，酸汁流埋落飯度，唔係咁好，薯泥凍，有份量，味道幾清，珍珠米煙韌，前菜青瓜紅蘿蔔正常，但白蘿蔔好苦澀！同店員反映過！佢話會通知廚房！手製竹蓆冷蕎麥麵（$80）竹𥱊上，好日式感覺，餐具好精緻！賣相靚，唔大份，蕎麥麵唔滑，但滿口麥味，肥髀沾淨冷麵汁比較寡（佢唔鍾意加配料）冰涼好味！蒸蛋夠滑，入面足料！雜錦串燒A($100)好多款式，抵食，熱辣辣，除了鮮菇比較乾之外！其他都好味！牛肉串燒（$40）燒到熱辣辣，油份出晒來，牛肉唔老，好香口！好味！店員斯文有禮，地方好坐，不失一個啱晒我哋游完水嘅選擇！