花朝軒 (Closed)

次次去西貢都係食海鮮，今次就決定試吓新野。呢間花朝軒喺全記後面，最出名嘅就係佢嘅片皮鴨，食過果然係名不虛傳。我哋叫咗一隻片皮鴨一食。片皮之前，店員拎左全隻鴨上黎俾我哋睇，睇落唔算好大，但係都唔細，片出嚟之後份量都幾多。配料方面都係同一般嘅片皮鴨一樣，有蔥、青瓜同埋醬汁。但係佢勝在啲包鴨嘅皮熱辣辣，份量又好足，唔會好似其他食肆咁，成日要加錢要多一籠皮。重點係佢嘅鴨超級好食，啲皮非常鬆脆，啲肉又好嫩滑，食到停唔到口。另外我哋仲嗌咗幾款點心。黑松露燒賣嘅賣相超級靚，上面黑松露都好多，入面有蝦有肉，非常好食。蝦餃好大粒，啲皮唔算太厚，入面有好多蝦。炸雲吞一共有三粒，炸到熱辣辣脆卜卜咁。炸奶黃饅頭都好特別，炸得好出色，外面脆得黎，入面又有流心嘅蛋黃，真係好好食。希望下次可以再食到佢嘅片皮鴨同埋試到佢嘅海鮮啦。