616牛肉火鍋專門店 (Closed)

多麼憎我太慢才識你😫呢間616食完之後應該會變成我打邊爐既首選。呢間專食牛既火鍋店，有唔同部位既牛可以揀，餐紙上仲寫閒要淥幾耐先食得，好岩我地呢啲唔太熟既人。餐牌係ipad咁，寫晒唔同部位既簡介，好方便！ 花雕蜆湯底 $98 無睇錯！成鍋都係蜆只係$98！新鮮又足料，真係好抵食，兩個人食左啲蜆都有3成飽🤪 。牛坑爪 $68 呢個係堅好食既部位！重牛味仲要好有咬口，啖啖手肉味真是正🤩 。牛朴肉 $48 呢個朴肉係多啲肥膏，淥大約6秒左右，有啲入口即溶既感覺！鐘意食肥既一定鐘意食呢個。吊龍伴 $68 早兩年返廣州時食過一間吊龍，又係好正好有牛味，但今次呢個失準左少少，無咩特別。總括黎講呢間616係平靚正食牛之選！😍一試即愛上！

一路有聽聞呢間牛肉火鍋唔錯，今日有機會同男友試下，店面唔算大，但幾有港式設計感。入到去坐底，係用I pad 點菜的。呢度真係專門食牛，牛以外既其他食物款式就比較少，不過我就覺得專注係一樣都係一種專業感。餐紙上門有介紹每款牛肉煮既最適合時間，貼心的。點好菜都上得幾快，並會附上一碟西瓜👀不過我同男友都麻麻地食西瓜，所以都同待應講唔需要喇😁廢事晒人d野嘛～醬料方面，係自助吧形式，見到豉油係牛油豉油，仲有牛肉汁，都幾特別。我叫左呢個飲，ok的，玫瑰香味酸酸甜甜咁。湯底見呢款幾特別咁，黎到又幾香，係青花椒麻辣湯底，辣度還好，麻味比較重，幾開胃的。因為呢個湯底，我叫左稻庭烏冬索晒d湯好正，我食左一個半烏冬咁多🙈脖仁：肉質爽滑，有油香味，最喜歡呢個👍🏻雙拼菇菌：秀珍菇甜，另一款我都唔知咩菇，之前未食過，但幾有驚喜，食落嗦嗦聲都幾甜🤩牛朴肉：肉汁比較多，質感都爽。牛坑爪：肉較淋，肉味較重，帶少少筋位，質感豐富。牛上肋：比較肥dd，似牛仔骨既感覺。牛舌：呢個正，雖然薄切，但好香淋juicy,滑嘟嘟咁。牛胸肉：睇相都知脂肪比例較高，一食落去滿口油香，比較膩d，但都好食😌仲有叫左個雙拼牛肉餃架，但未影已被男

我同朋友都係牛肉控，呢日出去紅磡做嘢，咁啱經過呢度，見到好多人淥緊牛肉，即刻好心動，決定喺呢度開餐! 坐低見到張墊枱紙隻牛牛寫咗唔同部位要淥幾耐，分得好仔細，好多名平時都無聽過，樣樣都想叫嚟試呀! 醬料係自助嘅，除一般調味料外，最特別係有牛肉汁，令鮮味提升。店員告知 like 佢哋 facebook 就可以用$1叫個鴛鴦酸菜牛骨湯，雖然係$1，但好足料同夠味，勁抵! 終於到萬眾期待嘅牛肉上場啦! 牛朴肉肥瘦相間，油質淋滑有油香，正正係我心頭好! 牛駝峰就牛肉味濃。牛坑爪就有咬口，愈愈有牛肉味。牛腩心係平時食到牛腩嗰種味，牛肉味濃，但有少少油香。吊龍伴就比較瘦，但肉味好濃，一啲都唔嚡口。胸口膀就係食油脂香，啖啖都好香濃，夾埋啲牛肉食，好食呀! 牛肉餃嘅餃皮煙韌，牛肉重香料味，配埋特製醬汁一齊食，幾特別!食咗咁多肉，都要食返啲菜中和吓，叫咗金菇同唐生菜，啲菜都新鮮。另外叫咗勁索湯嘅響鈴，吸晒牛肉湯嘅精華，正!呢度提供枝裝可樂，我見到緊係即叫啦，爽呀! 呢餐食咗咁多刁鑽靚牛肉，都好滿足呀!