金碧酒樓

Open Now

Now Closed

自從今年初第一次幫襯，到而家已經幫襯咗 4 次，呢個月仲要幫襯咗 2 次 🤭🤭早前帶媽媽食過一次，佢對呢度嘅杏汁豬肺湯念念不忘，佢生日就再嚟食多次啦 🙂 我哋一行 7 大 1 細，叫咗一個湯加 4 個懷舊餸都食唔晒。杏汁豬肺湯依然好香杏仁味，媽媽仍然讚口不絕，生菜包啲生菜好甜，中和返炒香嘅蠔豉冬菇肉醉同炒米粉。錦鹵雲吞小朋友食到眼閃閃 😅紅燒元蹄一上檯大隻到 O 晒嘴，食落唔油膩仲覺得啖啖骨膠原，到剁椒魚頭上檯又再 O 多次嘴，要幾大條魚先有咁大個魚頭? 哥哥叫咗中辣，我頂唔順，食咗小小都覺得好正，仲有粉絲墊底吸晒啲魚汁 👍👍👍早 2 日再同中學同學一行 11人嚟慶生，杏汁豬肺湯，生菜包同錦鹵雲吞係鐵膽，再加陳醋木耳，金碧小炒王，大魚兩食，花雕蛋白蒸大蝦同金華玉樹雞。陳醋木耳好入味，啲醋食得出係正嘢，金碧小炒王相比下有啲遜色，大魚兩食好正，尤其係蒜蓉蒸魚腩，無魚鱗之餘仲感覺到滿嘴骨膠原，花雕蒸大蝦好滑，有好多隻大蝦，金華玉樹雞餐牌上係無嘅，唔知點解同學知道有得叫呢？好明顯呢個係手工菜，清清哋好香。另外見其他檯都有叫釀鯪魚餐牌都係無，唔知仲有幾多樣神秘菜呢？

訂咗差唔多成個月嘅晚飯，實在令人期待又期待，果然名不虛傳!先上杏汁豬肺湯，好香杏仁味，豬肺有用鑊煎過，好多料，有薑，果皮等，每人有兩碗，正 👍生菜包，肉碎好好味，生菜好多。錦滷雲吞，成個組合好好味，我哋仲即時加多份 😅炸蝦丸，其實佢打得好好味架，不過相比其他有點比下去咯…蒸魚腸，呢個真係唔係我杯茶，試咗小小，都 ok 嘅，其他人就不停話好好味 😆百寶鴨，的料煮到淋晒好入味，好多料好填肚，攪到之後啲嘢都唔係好食得落啦 😭蜜汁脆鱔，朋友話次次都係好後先上呢個餸，熱食同攤涼食唔同味，我個肚唔爭氣無位啦 😖最後係糯米飯，足夠嘅花生，飯夠乾身，無得輸，都係只可以試小小。啲亞姐好好人，幫我哋影相好攪笑，另一位提揸機嗰個唔好影埋天花板，我哋自己影嗰時，有個亞姐又成日裝我哋個蛋糕 🤣🤣朋友已經想返嚟再食第二餐啦！餐廳坐位唔算舒適，裝飾好舊，食物大碟，要人多先可以試多幾個餸，佢都可以成日爆場，可想而知大家都係為美食而來 💖