碗碗香 (Closed)

一直都覺得大陸出品嘅麵好好食，估唔到係香港都可以食到。呢間店舖面積唔大，我哋揀咗個角落坐低。今日食嘅係貴州粉，其實冇聽過貴州呢個地方，真係第一次試。男友人叫咗個紅油牛肉粉，小辣，食落有啲麻，原來仲有隻bb辣，店家話係任何人都食到嘅辣，湯底加左花椒，所以會有麻香，用上等大紅袍精細磨製成花椒粉，有散寒，健脾同埋促進食慾嘅功效，估唔到食一碗普通嘅牛肉粉可以有咁健康嘅效果！我就試咗紅燒牛肉粉，呢個係唔辣嘅，邊個湯係用上等嘅豬骨加鮮雞做湯底，再加埋新鮮嘅牛骨，就係三骨原湯啦，呢個湯絕對冇味精，味道好濃郁，我都幾乎飲晒個湯底，飲完覺得好生津！兩碗牛肉粉都有泡菜做配料，其實即係酸菜，味道好清爽又酸脆多汁 ，好開胃！至於啲牛肉係上等牛展，筋同肉嘅比例都好均稱，咬落一啲都唔硬，好好味！而碗麵嘅精髓貴州粉係無添加，冇色素又冇味精，要煮幾個鐘，口感爽滑，唔易斷，又唔會太淋，夾起上黎好有彈性！最後每人叫左杯苦丁茶，店家話係解辣良品，飲完回甘嘅感覺久久不散，功效可以降血脂，降血壓同降血糖，非常健康。

Happy Friday Night 梗係要出街食飯鬆下，喺銅鑼灣想搵個地方食飯，最好不過當然係加路連山道，因為呢頭有好多隱藏嘅特式小店！ 今晚想食碗粉，見到開咗間貴州牛肉粉嘅，一於試下～Order咗兩個，有辣有唔辣！紅燒牛肉粉雖然係清湯，但湯頭清甜，聽老闆講佢地每朝早用大量嘅牛肉、豬骨同雞新鮮煲，配上口感軟熟嘅粒粒牛，仲有口感Q彈同好滑身嘅貴州米粉，真係好好味👍🏻👍🏻👍🏻紅油牛肉粉清湯配上濃濃嘅辣紅油，香味不錯，小辣對我嚟講辣度剛剛好，辣油同貴州米粉好夾，不錯不錯！口水雞偏辣，份量有點少，但雞件夠滑，麻味十足，味濃，係好味嘅～但係對唔到辣嘅朋友就未必食到。老闆同員工都好熱情同有善，但坐位有點迫，只能夠快食，不宜坐太耐。整體嚟講，味道都不錯，米粉口感特別，湯底清甜，小店確係有誠意，值得回頭再吃👍🏻👍🏻👍🏻