無二三 (Closed)

上個月又同D朋友去無二三食晚飯，我地之前都黎食過三次，都開始變成呢度既熟客，主要係鍾意呢度D野食整得好好味，價錢又合理，環境亦都舒舒服服～餐廳氛圍偏向"和洋風"，今次臨近聖誕去仲多咗D聖誕佈置！今次發現餐牌吸睛咗，款式比之前豐富咗～ 餐牌入面有分唔同種類既食物，例如沙律／冷盤／炸物／煮物／鐵板／燒物／麻糬堡／烏冬／飯類／甜品 等等。。最開心見到喺炸物入面加咗我至鍾意既海苔魷魚鬚！第一樣見到即嗌既就係海苔魷魚鬚， 份量都幾大兜！炸得好香脆，脆漿入面滿滿既海苔碎包住彈牙既魷魚鬚，食到停唔到口。。之後煮物就揀咗鰻魚玉子燒，呢款都係新菜式～份量亦都幾大份，厚厚既蛋卷包住唔少鰻魚喺入面，咬落去口感好嫩滑，蛋香味濃郁兼帶有微微甜味，再配合埋鰻魚同埋甜甜地既鰻魚醬汁一齊食 味道好夾！鐵板就揀個鐵板洋蔥豚肉，上菜時香氣撲鼻，豚肉同洋蔥都相當多，豚肉口感軟滑，再夾埋洋蔥既香甜同埋D醬汁一齊食，如果有埋碗白飯就正喇食落口仲夾雜D爽脆既甘荀絲，令口感更加豐富咗～跟住燒物就要咗蒜香味噌烤茄子，除咗聞到好香之外 賣相都好吸引，茄子烤到軟綿綿既質感，蒜香味噌味夠濃郁，好惹味！仲叫咗個和風炒飯，呢個又係新加既菜式～

之前幫襯咗呢度兩次, 食過午市同晚市都相當OK.今晚又帶埋友人去試其他菜式, 一向懶到出汁嘅我今次終於的起心肝寫寫食評. 原因好簡單, 用心做食物嘅餐廳買少見少, 絕對值得多啲人發掘到呢度.芝士年糕:一客有4件, 炸到金黃色, 色澤幾靚.做到外脆內軟嘅效果, 咬開入面有軟滑嘅年糕同埋流心芝士, 好香芝士味.炸菇條:平時比較少食炸菇條, 所以叫嚟試試, 好有驚喜.炸菇都幾大塊, 一入口係香脆嘅外層, 之後食到鮮甜軟嫩嘅菇條. 食落一啲都唔油膩.點埋一齊出場嘅醬油去食, 味道就更加豐富.櫻花蝦炒野菜:估唔到有超級勁多櫻花蝦, 所以成碟菜都好香, 特別係啲菇同翠玉瓜都吸晒櫻花蝦香味! 仲有唔少椰菜, 紅蘿蔔同洋蔥, 勁足料....$52好抵食!鐵板洋蔥豚肉:呢個嚟到嗰陣都係勁香.....用鐵板上 熱辣辣仲噴緊煙! 豚肉係用咗豚肉片, 肉質腍軟. 洋蔥夠熟唔會辣, 仲食到洋蔥嘅甜味, 撈埋啲汁一齊食好好味. 呢碟一樣好足料, 無論豚肉同洋蔥都有唔少.荔枝玫瑰梳打:呢度嘅飲品都做得好出色, 唔單止樣靚仲係堅好飲! 飲落去嘅感覺係清甜清新. 當我覺得兩層顏色嘅賣相已經好靚嘅時候,原來內有乾坤...

早排喺網上睇到有post介紹呢間餐廳, 因為個店名幾特別又易記, 早兩晚同朋友搵地方食嘢就諗起佢, 即刻上Openrice搵下有冇餐牌, 見價錢唔貴就過嚟試下!  餐廳地方唔算好大, 大概有十張枱, 但樓底高所以空間感足夠. 一入到去見到旁邊有個放咗唔同酒類嘅櫃, 再加埋牆上嘅裝飾, 整個環境感覺令我諗起之前喺日本去過嘅洋風居酒屋~ 我同朋友都唔算好餓, 於是就隨意叫咗個冷盤, 兩款小食, 一款甜品同埋梳打特飲. 冷盤試咗牛油果醬麻糬多士 ($68), 上枱時有驚喜, 用咗隻Martini杯裝住一大球牛油果醬, 個醬味道豐富而且食落好fresh, 配埋熱熱地又好香嘅麻糬多士一齊食都幾match! 麻糬多士都做到煙韌軟糯嘅口感, 不過真係要趁熱食, 因為我地有一塊攤凍咗先食個口感就會冇咁正~小食試咗鐵板豆腐 ($52) 同埋蔥花牛舌 ($58), 鐵板豆腐係熱辣辣滾住咁上枱, 嗰下已經聞到好香! 豆腐上面舖滿木魚碎郁郁下, 賣相好得~  厚厚嘅豆腐配上蒜香, 醬油同埋木魚碎, 簡簡單單已經夠好味.而蔥花牛舌亦都唔錯, 牛舌切得夠薄, 口感幾爽而且一啲都唔韌, 牛味又夠濃, 呢個小食應該都