時新漢堡飽 (Closed)

這間懷舊老店位於黃埔巴士總站對出的位置，與其他時尚的店其實有點格格不入，但正因為它的不同，特別映入眼簾。店舖內空間不算寛敝，不過都算舒服，平日夜晚光顧都不怕找不到位。餐牌上當然有各類的漢堡飽，可揀牛肉或豬肉，但也有飯食，但都是扒類飯。其他食物有炸雞脾、炸薯條、脆雞粒、炸洋蔥圈等等。喜歡重拾昔日情懷的你，這兒是個不錯的選擇。

睇Toy Story 4之前食個快飯，一落小巴就見到時新快餐店。昔日舊店分家，大哥係蕪湖街開左SHKB1963，二哥就用原名係黃埔開左間。之前食過大哥果間，今次試下二哥呢間比拼下。呢度舖面較大，平日晚上到七點半都差唔多有八成滿，不過食快餐就係流轉快，唔駛等位。一行入黎收銀姐姐就俾個餐牌叫我坐低慢慢睇，又唔會催你落單。餐牌真係好多野揀，除左招牌既漢堡外，碟頭飯、粉麵都有好多餸選擇。唔想諗既話仲有套餐揀，不過我地想試推介既炸雞脾，所以就散叫左兩個雙層漢堡包、兩個小食同一杯特飲share。落單之後等大概十分鐘就叫號去櫃面自取，所有野食都係熱辣辣即叫即整，即刻加哂分。個漢堡望落去好似細細個，但食落去會發覺好有份量，雙層漢堡包有兩大塊肉，女仔食到一半都飽左一半。塊漢堡用新鮮牛肉配料整成，食落同二哥店既唔同。最好味既就係個時新醬，比平常既沙律醬稀d，但夾雜著好多果粒，係種清新感而唔係突兀既甜，好味過超市買到既水果沙律醬好多。 配料可以揀芝士、火腿同煎蛋，比舊店多左火腿揀，岩哂食肉獸。不過我都係鍾意芝士同煎蛋，食返原店風味，口感rich d炸雞脾真係不得了，外皮脆得黎係炸到好乾身，冇乜多餘既油流出黎

時新簡直係我兒時既回憶，雖然依家搬左新地址，但都係在紅磡區，咁就腳可以繼續幫襯。雙層漢堡芝士蛋包($35)，揀左牛肉漢堡配時新醬，漢堡重牛味，而且鎖到肉汁在裏面，醬汁甜甜地，好夾。吉列牛扒包($28)，外層吉列粉漿好鬆脆，外脆內軟腍。炸薯條($22)，夠熱辣辣，而且仲係兒時回憶既波浪紋薯條。黑椒雞脾($27)，先將雞脾炸過，另外配上黑椒汁，黑椒味濃郁，雞脾好香脆，而且唔乾身，仲有都幾大隻。菠蘿冰($23)，首先夠晒冰涼，而且仲有大大粒菠蘿肉。凍檸檬利賓納($23)，味道唔會太甜，同樣冰冰涼涼咁，好爽。