千之壽

Open Now

Now Closed

星期日瞓晏咗少少，所以直接等多陣食下午茶時段，去到坐滿晒人，都要等一陣，不過唔算等好耐10-15分鐘左右！第三次食千之壽，個人認為係元朗抵食又大份既日本料理！蟹籽沙律 $47，勁大兜，好足料，勁多蟹籽同蟹柳絲，配勁大兜沙律醬自己撈，次次去食千之壽都會叫呢一個！叫左8款壽司，分別係甜蛋$9、甘蝦$14、帶子$16、北寄貝$14、芥辣八爪魚$14、辣味三文魚$11、櫻花魷魚$13、榮螺片$9｜壽司特別推薦帶子壽司，好大粒啖啖肉有咬口！甘蝦壽司，一件有兩隻甘蝦，必食推介！加州反卷$55，total有8件，蟹籽都係勁多，多到滿瀉吉列蝦餅(4件)$34，超好食，記得一定要襯熱食！好香蝦味，推介！炸軟殼蟹手卷$27，勁大件！個人認為比起一般平時喺街買嗰啲手卷再大件少少，軟殼蟹好好食炸得啱啱好，同樣都係勁多蟹籽淨拉麵(地獄湯)，單點壽司後可以加$38選拉麵、烏冬或者冷麵，之前食過覺得唔錯，不過今次再食覺得個拉麵淋咗少少，如果硬身返啲會好啲，地獄湯好夠辣！下午茶時段全單8折！冇加一！勁抵！！

呢間嘢食過好多次，其中一個原因就係唔洗等位，喺元朗就算係d連鎖店都要排最少半個鐘，呢到因爲比較偏僻少少，遠離大馬路，相對少d人過嚟。每次嚟呢到一定會叫一個蟹籽沙律，青瓜、蟹柳同蟹籽每樣嘢都好多，沙律醬分開上，大家想落幾多就落幾多，我多數落一半或者八成。個沙律裝到好滿，小心撈到周圍都係。另外重叫咗幾嚿壽司同一個手卷，火炙三文魚亦都係一個推介，三文魚好厚身，可以一試。重有一個三文魚頭煲，本身諗住得一兩嚿三文魚頭喺入面，點知越食越多，應該有4-5嚿，幾抵食😋

元朗有好多日式餐廳都有長尾壽司 呢間都唔例外 仲有好多其他放題食物 可以平平地偽放題佢長尾得黎仲有厚度 三文魚亦都甜 唯獨係個壽司飯有d唔夠凍 不過$11一件真係抵食啦刺身盤入面有原板既馬糞海膽同埋三文魚、魷魚、蝦刺身各兩片 海膽唔係太鮮甜 不過可以夾埋紫菜一大啖咁食係好過癮 其他刺身都好甜 特別係魷魚！而三文魚刺身亦非常厚切！蠔控見到$30有4隻蠔當然唔可以放過啦 炸得十分鬆脆 而且炸粉唔會厚 但炸完依然可以保持到入面既蠔非常juicy大隻 蠔既質素都唔錯 唔會腥又大隻 係蠔味就少d基本上檯檯都會有叫蟹籽沙律 因為真係好抵好大碗！好采叫左細咋 如果唔係咁大碗真係食唔唒呀 雖然材料只有青瓜絲同蟹柳絲 但係你睇下d蟹籽多到！！ 真係淨係食蟹籽都抵啦

馬田呢邊因為就近中學…所以愈來愈多食肆林立…見到門口咁多學生排隊等位…於是乎走走看…大大個餐牌放左係門口…係日式食品…看來都唔差吧…而且價錢相當便宜…相等於茶餐廳呢…不過地方淺窄…一定要搭枱坐…前菜小食…例牌果幾味…反卷好實淨…螺肉有7、8粒…小爪魚有3、4個…沙律醬好多…蟹籽亦唔少…一d都唔孤寒…飯睇落得一碗仔…但其實壓得好實…靖魚肉好實淨…鹽燒已經好夠味…煎得咁香脆…連唔食魚皮既我都食哂…望落去唔多似地獄…朋友話唔辣…拉麵就腍左d...豬軟骨都夠腍入味…湯底唔突出…烏冬同拉麵同樣都係過腍…蝦餅幾好味…可惜浸腍左…軟殼蟹係新鮮炸出黎…有3、4隻蟹腳…凍烏冬比湯烏冬更加爽而彈牙…撈混沉左係底既芝麻醬…甜甜地又開胃…朋友讚不絕口…雖然午餐時份要等位…但相信時間唔會好耐…因為大部份都係學生黎…趕住返學唔會久留…而且唔駛40蚊仲包埋餐飲汽水…真係超值…