河內越式料理 (西洋菜南街)

Open Now

Now Closed

西洋菜南街不嬲都多野食，見到呢間越式餐廳價錢親民，而且即使過咗中午時間依然係全場滿座，所以就決定喺到食返碗越式湯河嚕～生熟牛肉湯河粉💰HK$66牛肉份量多，有半肥半瘦牛腩同埋生牛肉片呢兩種，肉質唔會柴，而河粉就係偏幼身果一款，食落質感嫩滑有米香，仲要掛湯能力極高～極品牛三寶湯河粉💰HK$71有口感彈牙嘅牛丸、軟腍腍嘅牛展同埋生牛肉片！最中意就係碗麵個牛骨湯底真係好鮮甜，味道好濃厚～越式豬頸肉(細)💰HK$32豬頸肉用香茅香煎至金黃色，半肥半瘦，肉質爽口多汁，唔會令人覺得太油膩，配埋泰式辣醬，味道一流～(熱)杞子龍眼茶💰跟餐+HK$5因為唔想飲凍野，見到呢杯杞子龍眼茶好似好補咁樣，飲落去有啲似黑糖茶，而且仲好足料，好多杞子同埋龍眼肉，係一個養生嘅選擇～鮮芒果西米露💰 跟餐+HK$10呢杯西米露好有驚喜，好重椰汁味，原本好擔心會死甜，好彩係唔會太甜，飲哂成杯都唔會有罪惡感！面頭啲芒果肉超甜唔會酸，加埋西米，成杯野口感非常豐富～

到旺角同客戶開會開得好遲，見到哩間鋪頭都幾人氣，咁試試啦。晚市都幾多嘢食揀，60左右已經有碗粉面或者飯。椰子冰，椰子味好濃鬱，不過唔會好甜，啱曬女仔飲。熱奶茶，奶和茶味balance得幾好，飲落好順滑。香茅雞翼（2件），雞翼燒得啱啱好，皮脆啵啵，內裡好嫩，雞翼預先醃制過，好夠味。越式豬頸肉（細），細份豬頸肉分量都幾多下，仲搭配埋泰式酸辣醬。豬頸肉食落好彈牙，唔會覺得柴，唔錯。河內紮肉湯河粉，湯底好濃鬱，飲得出係落足料黎煲，食完唔會口渴，味精落得唔多。紮肉大件件都有4-5件，仲伴有芽菜等配料，好食。順化番茄蟹肉紮肉湯檬，湯底番茄味好重，蟹肉分量好多，仲有豆蔔，紮肉等配料，叫咗少檬都好大一碗，落埋辣椒同青檸更加好味。求其一餐都幾驚喜，難怪晚市全full，仲不停有客人walk in，應該都有好多街坊幫襯哩間小店。

旺角西洋菜南街絕對稱得上係「環球美食街」😆諗唔到食咩?!落去行一陣，一定搵到間啱心水🦾而家凍冰冰就最啱食熱辣辣嘅<<河内雞絲湯河粉>>($56)🤗男朋友嗰碗<<河內牛腩片湯河粉>>($64)嘅湯底味道同我嗰碗一樣💁🏻‍♀️💁🏻‍♂️香濃鮮甜，好多芽菜同洋蔥~越南河好滑! 而且好多!我夾咗兩大羹俾男朋友，我都仲係覺得好多好飽🤰🏻我哋仲追加咗小食🫣<<越式炸春卷(2件)>>其實係得一條~ 不過一開二，一嚿都好大!!!!成個口充滿住豬肉、黑木耳絲、紅蘿蔔絲等等嘅材料，好多餡👏🏻薄切<<越式豬頸肉(細)>>($29)都好爽口㗎~口感唔錯👍🏻我仲好欣賞我杯<<杞子龍眼茶>>☕️+$5 咋! 有成十粒以上嘅龍眼肉🤩好好飲之餘又有得咬! 啲龍眼肉仲好甜添🥰

夏日炎炎實在令人提唔起勁煮飯，同先生行完魚街索性買埋外賣返去做晚餐。餐廳食物選擇多，而且價錢抵食，門口有大大個餐牌，方便食客叫外賣。豬頸肉一客三至四件，香口彈牙而且唔油膩，味道亦唔錯。先生每次必食嘅極品牛三寶，湯底香濃而且配料豐富，有生牛肉、牛𦟌同牛丸，最欣賞佢嘅牛𦟌，唔會太過軟爛。天氣實在太熱所以我今次叫咗香茅豬扒撈檬，豬扒唔算厚但香茅味好濃，配搭酸甜爽口嘅撈檬解暑一流。粉麵加十蚊就有特飲，味道方面中規中矩，椰汁味道稍淡，但勝在甜度適中，清新解渴。呢間越式餐廳我哋已經幫襯過好多次，貪佢好味又抵食，仲可以平價追加小食同特飲，而且叫外賣起菜亦好快，係我哋嘅外賣首選！