一寿司 (Closed)

午飯時間黎到一壽司，毋須等位，入到去一陣，被安排到中間梳化位就坐，空間好寬敞。打開午市餐牌，食物種款多元化，定食、魚生飯、石鍋、拉麵等樣樣齊。好快甘點左個卷物定食，定食送埋土瓶海鮮湯、黑松露茶碗蒸及吉列南瓜餅，好豐富! 侍應亦順帶提一提南瓜餅即叫即炸，所以要等一段時間。等左15分鐘到定食一併黎到，當然先食即叫即炸的南瓜餅先。南瓜餅炸得好鬆脆，黎到時仲熱，咬落去南瓜軟淋淋，加埋沙律醬更好食!意想唔到最好食係黑松露茶碗蒸，蛋滑一滑，帶有好香的黑松露味添。同樣附送的土瓶海鮮湯清清地亦唔錯，打開蓋有唔少蜆，好足料。卷物定食包括8件壽司，有火灸芝士天婦羅卷、芒果三文魚卷、海鰻加州卷及槍魚卷。卷物最忌太過散，但呢到整得剛剛好，不會一夾就散開。個人認為火灸芝士天婦羅卷較好味，雖芝士味稱不上太濃，但夾住脆脆天婦羅，好脆口。芒果三文魚卷亦新鮮，三文魚滑一滑，夾住甜甜地的芒果，好開胃! 可能不太食慣槍魚，碎碎的味道，感覺奇怪。另點左個軟殼蟹手卷，雖然軟殼蟹好脆，但手卷黎到時已凍晒，有D失望。不過整體食物唔錯，定食附送左好多野，好味又抵食。