卓越食品餅店 (Moved) New Location

周街好多都係工場一次過整完入哂盒咁放係度賣，會即日整既傳統糕點買少見少，仲要係裝修仲要保留住舊式小店風味更加少。有好多唔同種類既糕點賣，不過去到有好多都已經無哂真係好搶手，,而且價錢都唔算好貴，下次可以試多幾款。迷你版砵仔糕一啖食哂夠方便，黃砵仔糕($2)同香色既椰汁砵仔糕($2.5)，紅豆粒粒分明又唔會太淋身又唔過甜，椰汁味仲好濃添，一啖食哂岩岩好。荳沙軟餅($3)好煙靭，荳沙超滑兩啖食得完。店名: 卓越食品餅店地址: 西環皇后大道西183號地下

卓越食品餅店喺西環區都好多年歷史，供應傳統中式小食、糕點，有蛋散、蓮蓉酥、嚤囉酥、砵仔糕、桂花糕、糯米糍等。由門面、裝潢到店員 都聞到一陣懷舊味道，食懷舊野就唔好講價錢，更何況仲要賣得唔貴。4點幾鐘去到乜都賣哂咁滯，冇乜選擇下，諗起唔知幾耐冇食過砵仔糕，買左兩粒過下口癮。黃砵仔糕 $2/個；$15/8個(迷你)本來仲有椰汁砵仔糕但賣哂… 咁我大膽假設椰汁版應該係好食啲(?) 價錢咁平係因為size細細隻，一口放得入，啱哂懶人。砵仔糕挺身 ，軟硬適中，紅豆唔算好多，甜度剛好，我唔清楚人地做法，正唔正宗唔敢講，但幾好食！（食唔到椰汁味添）識做呢啲傳統糕點嘅人愈黎愈少，經過嘅咪試下囉。