明珠閣 (Closed)

晚上唔肚餓，但都要食啲嘢嘅，周圍睇吓邊度有平嘢食啦，見到明珠閣8點半後有8折，咁就走入去食啦，之前夜晚都食過，覺得貴所以食完嗰次之後都無再幫襯了。今晚見到有折，而且唔多肚餓，所以再試吓啦。今次都係叫返上次叫過嘅黯然銷魂飯，即係叉燒旦飯，兩次感覺唔同，上次的叉燒感覺新鮮啲，但成碗飯都好少分量，上次覺得唔抵食，但今次可能夜，接近收工，所以叉燒分量多，但覺得唔太新鮮。另外叫咗隻乳鴿，這乳鴿 size細，無乜肉食，但味道都唔錯的。整體如果有8折都可以食吓，但無折就感覺貴，唔多捨得食。下次有折諗住試吓蝦蒸飯，這款要百幾蚊的。

今晚我們喺沙田附近做完嘢之後去咗新城市廣場行吓，行到去一間「明珠閣」見到有幾多人排隊等位，所以我們就決定入去食晚飯！我們叫咗黯然銷魂飯嘅叉燒肉質雖然相當鬆軟，但表面就燒到色澤比較深色，感覺有啲燶黑，而煎蛋嘅表面加咗乾蔥、紫洋蔥同蔥花，令到味道更加芳香惹味！晶瑩鮮蝦餃嘅餃皮好晶瑩薄身，蝦肉相當爽甜彈牙，而且都幾多汁！滑蛋蝦仁帶子炒河嘅河粉麵質好煙煙韌韌，蝦仁同帶子好鮮味彈牙，再淋上香滑嘅滑蛋喺表面，真係好正呀！小雲吞鷄湯嘅湯底味道好鮮甜香濃，雲吞嘅皮相當薄身，而且好軟滑，但鷄肉嘅肉質就有啲「粗嚡」！福建炒飯炒河一樣都係用個小鐵煎鍋盛載著上碟，賣相都幾吸引，而且炒得都幾夠鑊氣，材料亦好豐富有：蝦肉、帶子、鷄肉、瑤柱絲、翠玉瓜粒等等等等⋯⋯真係幾足料抵食！