尖東海傍一向係飲嘢聖地，新開“Mulino”就反行其道主打精緻地中海菜&炭火烤肉，並由埃及烹飪總監Mohamed Hegazy、摩洛哥籍行政總廚Faycal El Moujahid主理。二人早於2010年杜拜豪華酒店工作認識，估唔到喺香港都有機會試到二人手藝。
總廚Faycal El Moujahid有感尖東海傍好少坐低食飯嘅地方，希望大家喺度可以一邊享受烤肉海鮮、一邊飲嘢relax吓。
“Mulino”有寬敞戶外座位。
室內則充滿異國航海氣氛。
【炭爐烤肉】
香港人可能對中東菜有啲陌生，其實乳酪、芝士、海鮮都係常見食材，香濃健康。當地人夜晚就鍾意食烤肉飲酒，呢度更設厚木炭明火爐，全部烤肉即叫即燒有種獨特炭味㗎。
私心推薦烤肉Arabic Lamb Kofta，係阿拉伯做法烤免治羊肉，嗰種惹味肉香好少喺香港食到。
(左)Middle Eastern Grilled Chicken Skewer、(右)Arabic Lamb Kofta
全部烤肉用真炭爐即叫即燒。
Lamb Rib Cumin
原來地中海菜好常用孜然調味㗎，用於佢哋最拿手嘅烤羊肉上更惹味。呢個羊排係用羊肋位，肉質勁軟嫩～最爽食法係直接用手拎起羊架咬，羊肉嫩到一咬離骨。
【海鮮】
Freshly Shucked Oyster
呢度有多款紅白酒、Cocktail，配埋即開生蠔都幾chill。每季都會引入唔同時令生蠔，呢幾個月主要就係法國生蠔。
Royal Seafood Tower
佢哋嘅Seafood Tower都好豐富，飲白酒必點～有新鮮龍蝦、帝王蟹、藍青口、新鮮即開生蠔同粉紅大蝦，配檸檬、Cocktail & Mignonette Sauce。
【專人料理】
Seafood Carta Fata
熱辣辣燉煮海鮮、香草同羅勒番茄醬會放於密封膠袋中，上枱時專人即席剪開，香味即刻湧出嚟呀～放心膠袋係耐高溫，適合焗煮㗎。
Tableside Mutable
呢款係經典中東料理，幾乎每間餐廳都有自己獨特配料嘅Tableside Mutable。喺度更有專人喺你面前即席製作，將煙燻Aubergine茄子壓成蓉，再混入芝麻醬、橄欖油等，最後灑上各種蔬菜水果，口感軟綿綿㗎。
【香濃前菜】
其實地中海菜好健康，當地人擅長將水果、蔬菜、果仁、芝士入饌，好啱作為晚餐前菜。
Burratina
呢度有唔少素食料理，想go green吓都得。呢道Burrata就將軟滑水牛芝士，配上無基因改造番茄、桃、陳年醋同羅勒。最驚喜桃片都有輕輕炭燒過，有種獨特煙燻味。
Zaatarbeets Salad
望落同我哋食開嘅沙律好唔同，係將紅菜頭片鋪滿碟上，再灑上
菲達芝士、杏仁碎同橙。將紅菜頭夾住配料一齊食，清甜得嚟又有芝士同果仁嘅鹹香，好有層次。
Vitello Tonnato
估唔到前菜嘅慢煮牛肉都好出色，將牛肉最嫩嘅Veal Loin位慢煮，牛肉嫩到好似喺口中融化咁～記住沾埋吞拿魚醬、刺山柑一齊食，口感更濃郁。
Shrimp Scampi
前菜亦有呢道香煎虎蝦，配上香蒜白酒汁，食落少少香辣好醒胃。
【人氣主菜】
Risotto Verde
主菜都有素食選擇，呢道意大利飯以荷蘭豆、水牛芝士煮製。簡單清雅，creamy口感食完好滿足。
Pappardelle Ragu
意大利麵則推薦牛面肉入饌嘅闊麵。牛面肉煮到勁軟腍，上枱時專人更會幫你壓開牛肉，可以望到真係勁嫩㗎～
Rustic Italian Oxtail Stew
本身以為係一般牛尾，但一入口湧出嘅超濃牛香真係好深刻。牛尾用西西里番茄醬燉煮，肉質變腍時再加意式香草、番茄醬一齊煮勁入味。
Baked Aubergine Roll
平時好少食到嘅烤茄子卷，配埋薯蓉、意大利番茄醬、巴馬臣芝士一齊食，口味勁地道。
【即調雞尾酒】
呢度仲有多款Cocktail打卡～
大玩仙氣Smoky Mill。
(左)Pironette、(右)Cocktail of the Month(每月不同)
Mulino
地址: 尖沙咀麼地道62號永安廣場地下1-6及45-46號舖
電話: 27213600