南園餐廳

Open Now

Now Closed

別以為在市政局街市中的熟食中心又髒又不衛生，其實，很多食物又便宜又好吃，老板員工服務特別好，比起其他新式餐廳有過之而無不及。這次借書經過瑞和街街市，想了想沒甚麼好選的餐廳，倒不如前熟食中心看看。原來熟食中心又有泰菜、中菜以及茶餐廳，天氣炎熱，但空調十足，還有大電視可看新聞和奧運比賽啊！坐下來，老板員工都有禮友善，服務態度特別好。我吃個香港人喜歡的常餐，邊吃邊看電視，茶餐廳就就香港文化，上菜快，食物好吃。生活天天與時間競賽！吃好了便又上班去！

市政大廈熟食中心食午餐基本要求就係涼快平靚正。呢度除左呢d基本野，最大特點係有個非常有禮又客氣的好老闆，有一大堆學生哥同中佬等住杯汽水同碟頭飯，老闆都有講有等咁跟單同送上食物。想體驗有服務質素的佬飯，自己去感受下🤭

喜歡四圍食吓,今午到觀塘,走上南園餐廳,位於瑞和街市政大廈4 樓既熟食檔,食個簡單既茶餐.常餐($38）沙爹牛湯意粉,沙爹牛肉,已煮好備用,煮好咗意粉,加沙爹牛肉,然後淋湯上面, 沙爹汁一般般,味道濃淡適中,牛肉,有肉味,不错;意粉,大大碗,適中口感,不算太淋.湯底,普通,正常的.火腿煎蛋,正常表現.牛油方包,正常.(轉多士要加两蚊喎）奶茶,有點澀,比一般茶記水準低少少.多以街坊客為主.店主店員同客人有傾有講.有親切感.

好搞笑原來同一個位置朝早係南園餐廳夜晚就係劉記大排檔今朝好難得過嚟食早餐一於試吓佢其實佢日間位置好大啲枱隔得好疏 坐得幾舒服唔會好似人貼人咁逼坐低咗睇睇餐牌先其實都幾多選擇有三文治粉麵餐又有啲好似歐陸早餐不過穩陣起見都係試一試佢個招牌沙嗲牛今次係叫咗三餸麵茶餐炒蛋、沙嗲牛、叉燒！加錢配埋個出前一丁麵炒蛋夠滑 沙嗲牛夠惹味不過叉燒就比較遜色少少好似𡁻緊嚿柴咁一丁麵煮得夠出色彈牙！其實有好多茶記就算加錢轉一丁都係可以煮得好難食不過呢間真係唔錯同埋呢度老闆夥計都係好有禮貌服務做得好好抵讚會再做回頭客

足料豬扒炒烏冬，數埋超過10件豬扒，食到飽飽；夠晒鑊氣，而火喉又剛剛好，不太乾，不太濕！調味料適中，有味但不會太鹹，食完之後冇乜口乾感覺，應該冇味精！豬扒七八成瘦，剛剛好！否則變咗豬肉乾！價錢適中！環境乾淨！

由於女兒中午要上興趣班, 所以有時會在這裡食午飯, 因為這個熟食中心是有冷氣, 所以夏天天熱時都食得舒服涼快, 這裡的滑蛋豬扒飯一向都幾好食, 豬扒份量多之餘又煎得鬆軟入味, 滑蛋汁味道好好,  好啱用來餸飯, 所以女兒一向都好鍾意食這裡的滑蛋豬扒飯, 有時人客多老細更會親自下廚, 我們吃的飯就是出自老細, 又大碟又好味。再加$4一杯紅豆冰, 即時暑氣盡消, 飯加紅豆冰都是$42元, 還有糖水送, 觀塘來講算是好抵食了。

同同事經觀塘，未岀糧要搵平晏食，於是上咗街市四樓嘅熟食中心食南園。$33蚊嘅價錢，食到碟飯，凍飲加二，去邊搵？仲要係紅豆冰同雜果冰都係加二。咁抵飲，即刻嗌個魚香茄子飯+紅豆冰，$35攪掂！！個飯茄子入味，多汁，可以餸曬成碟飯。紅豆冰，紅豆都多，有大半杯。唔係好甜。另一個抵食位係中湯無限飲

唔好一去到街市4樓就俾個著底衫嘅肥佬嘅大叫嚇親，佢係南園嘅老闆，其實好好人，每次我去食都會送幾舊麥樂雞。附近可能污糟D但嘢食真係好正，最緊要抵！南園嘅西炒飯真係出色，唔酸之餘仲要甜甜地，仲落重配料同好大份！真係超級抵食！南園仲為每位食客準備中湯同糖水，每人最多可以食一碗，自助形式，糖水通常都係椰汁西米露，淡淡嘅甜味！

在街市的小店，不要對環境有要求，因為絕對不會乾淨，但起碼可以接受。要了一個豬扒包，用的是芝麻軟豬仔包，得香脆非常。而豬扒是吉列的，炸得很乾身，薄薄的一片，配上豬仔包，非常好吃。

十一月下旬‧晴周日的下午也要喝一杯咖啡，在觀塘區最好的不是這裡，不過有時也要試試其實地方的。要了個豬扒包的餐，包是附近英發的芝麻豬，烘得熱熱的，對辦。豬扒是炸豬扒，幾鬆脆而且不韌。加上蕃茄及沙律醬，真的幾好吃！杯咖啡就一般，濃郁但不香，還可更好。

對上一次來這個街市的熟食中心，是年多前與舊同事，在阿叔小廚飯聚。今天阿叔已結業，路口的南園，食正門口位，生意興隆，這個檔口以賣特餐，小吃，炒粉麵飯為主。赫見檔口前掛著個牌，寫著沙嗲牛肉飽，便要一個試試，總好過來來去去，都是千篇一律的特餐。奶茶頗香滑，但質感單薄，茶味不足。不吃沙嗲牛麵，吃沙嗲牛包，其實差不多，用同一個沙嗲牛，只是不同的演繹方式罷了，牛肉太過鬆，但沙嗲汁味香濃，夠入味，尚能補救牛肉的不足。沒有套餐，只能單點，盛惠＄23。

十二月下旬‧晴再來一次，今次是二人行，除了喝咖啡奶茶，不吃沙爹牛肉包，吃炸脾。炸脾看外表已知不太脆，油油的，尤幸吃起來味道還不錯。再吃下去，明顯的發現是鹵水雞脾，非生炸，印象打了點折扣。原來奶茶也很不錯，幾有茶味。

十二月上旬‧晴早了點來，想先喝杯咖啡，當然也要吃點東西，就要了個沙爹牛肉包。沙爹牛肉沒有什麼味道，明顯是給化學品恨恨的招呼過。反而豬仔包烘熱了的，沾了點沙爹汁，幾好吃。咖啡不錯，幾香濃。不過早餐沒有這個選擇，「散叫價」20元，不便宜。

上一次誤打誤撞去了南園餐廳吃午飯，這才發現它的炒粉麵十分之有鑊氣，因此令我們留下了良好的印象• 今天我和老公在下午茶時段又去光顧，叫了沙爹牛肉飽，鮮油多和熱奶茶，味道如下: 沙爹牛肉飽: 沙爹牛肉夠味多汁，份量足，飽也軟熟‧鮮油多: 好正! 鲜牛油大大件，而且麵飽仍然香脆，very good!熱奶茶: 有茶味和奶味，但是味道唔夠厚‧

難得假期早上一條友，買份蘋果去左呢度食早餐﹗上到來熟食市場，估唔到呢間野有冷氣喎，仲要係幾鬼涼0個隻，很難得﹗點左個蛋治腿通餐，蛋炒得很滑，岩岩好仲有蛋汁流出，好味腿通大大碗，我咁大食都食唔哂﹗最緊要係碗coffee，很香很濃，愛走糖的我飲得津津有味19蚊份，抵食﹗