盆滿缽滿

Open Now

Now Closed

其實知道呢間舖，不過一直未有去試。今日，我媽話要嚟呢度買外賣，是但啦，佢ok就得。食物種類都幾多。價錢就十分超值，廿幾蚊一個兩餸飯，而且仲幾好味，去邊度搵？長者同學生仲有特價，問你服未？！另外，老闆娘好有耐心咁招呼我阿媽「婆婆唔要咁多飯係咪？咁多飯夠唔夠？⋯咁呢？⋯咁呢？⋯咁樣呢？⋯」「婆婆鍾意瓜，比多啲婆婆啦」，其實已經好多，多到有啲食唔晒。嗰刻有啲感動，相比不遠處嘅連鎖大集團快餐店，邊有可能會有呢啲招呼。唔係貪小便宜，而係感覺到呢間舖有heart。依家咁嘅生活環境，租貴人工又唔平，但有咁嘅食物質素同服務，的確唔容易。祝有好生意，同埋多謝關照老人家！

通常都係幫襯開超級市場嘅三餸飯好少喺街市買嘢食，但今日因為工作經過美林村發現街市入面竟然有一間專賣三餸飯嘅食店。工作咗成日只係想求其填飽個肚就算，所以買咗個三餸飯食，本來都以為平平無奇，內裏卻是充滿驚喜。今日叫咗蕃茄炒蛋、咕嚕肉同豬手加多少少菜，食完之後俾我嘅感覺喺「家的味道」，都真係幾好味 😋。蕃茄炒蛋汁同蛋嘅份量啱啱好唔會太過水同淋，豬手整得都好入味，咕嚕肉酸甜度適中。呢個飯令我食得好滿意，估唔到街市入面嘅三餸飯都幾出色，絕對唔可以睇少。平民化的價錢食到家的味道，充滿驚喜。下次再經過都會幫襯

街市新開嘅外賣飯店👍🏻好奇心驅使下試咗一次！疫情下嘅香港，收入同埋心態大受影響，而係有良心小店推出又平又好食嘅外賣飯盒，實在係香港人嘅福音☺️講真30幾蚊，一個飯一個湯，本身對食物唔算好大期望😅點知返到屋企一放落口，就發現大有驚喜😜😜😜雞翼同埋咕嚕肉都非常入味，而唔係靠調味料喺外層加味；大廚果然有兩手👍🏻👍🏻食物品質遠超期望。另外不得不提湯品，足料、夠味、冇味精，好似屋企煮嘅一樣，直頭想落番去問佢可唔可以要多碗😭😭😭總括而言，性價比超高，住喺大圍站附近嘅街坊絕對值得一試。

夏天熱辣辣，真係唔會想係屋企煮飯囉所以最啱就係去買啦！大圍新開咗一間三餸飯嘅外賣店，日日都新鮮款式，而且中午同夜晚賣嘅又唔一樣喎，絕對有充足嘅新鮮感嘞！大家估下呢個兩餸飯連湯幾錢？加埋都唔洗$40呀！但係佢哋嘅湯就日日唔同，而且仲無味精，係佢哋每日自己煲㗎，所以味道唔會好咸，反而仲好足料！今次就揀咗咖喱薯仔排骨拼豬手蓮藕，咖喱準非精正，唔會係煮到水果款，而排骨都好淋！至於豬手略嫌唔算好淋，不過就好入味啦！其實個飯咁大盒都只係30幾蚊，抵啦！