祥基茶餐廳

Open Now

Now Closed

轉眼三年無黎喇祥基，原本諗住獨自去萬利食勁辣沙嗲車仔麵，急急食完就去鏢賽，突然新隊友要請一齊食晚飯，當然好啦。炸雞中翼酸辣肉碎出前一丁，幾得意又有創意喎，好少見就試試先。雖然只係白烚麵送到，上檯後可以按自己個人口味落湯粉及麻油。味道及麵質都比想像中好食，可能因為酸辣大頭菜肉碎本身已咸咸香香而味濃。不過始終有點麵還麵、湯還湯的感覺，無一齊煮過麻！炸雞中翼除左雞皮香脆外，咬落油淋淋又翻炸乾爭爭，試一便夠，如果用大量茄汁浸住食應該好一點。食晒碗麵但炸雞翼都未到，等了又等。 

入冬後一直對羊腩煲心掛掛，近幾日氣溫驟降就更加忍無可忍，點到要食次羊腩補補去﹗太和火車站出閘一直盤算緊幫襯邊間食店好呢，大鹿鳴、新鹿鳴？路徑祥基發現有羊腩煲供應又有位，唔諗咁多坐低先講啦。我問四眼妹妹羊腩煲有無煲仔菜份量架？原多只有火鍋，不過有大鍋、細鍋選擇。洗咩驚呀，照食可也。場中各位叔伯兄弟都投以艷羡既眼神，一個人的羊腩煲，爽呀﹗羊腩火鍋細送飲送湯送菜，仲要係明火煲住食，大大煲只需 $168，非常抵砌喎。後面一家四口眼望望，佢地都只係食個大架乍，哈哈。全場第一個叫羊腩煲，侍應妹妹、洗碗嬸嬸、廚房師傅、老闆叔叔輪住黎招呼，真有點受寵若驚。侍應馬尾姐姐好雙乳，侍應叔叔熱情關心，good。青紅蘿蔔豬骨湯，跟西洋菜豬骨湯、蕃茄薯仔湯都樣經典。雖然飲得出不是老火湯，幸好味濃香味而肉味出眾，感覺不到味精的存在，心滿意足。羊腩火鍋細送飲送湯送菜，萬眾期待既羊腩出場 ﹗在我面前沉睡著，要耐心地等他慢慢蘇醒。大大煲真的要加多兩錢耐性呢，靜蠅蠅等到想瞓覺啊 ﹗望穿秋水，十多分鐘後終於滾開，薰芳飄飄，口水直流。香噴噴充積整間祥基，各食家都張視線轉到我的羊腩煲上，眼晴閃閃發光呢。好肚餓喇，等我抄抄咩料先。

工作中午餐，都係以近及泊車行先，一間普通茶餐廳， 地方殘舊，感覺家庭式，地板及枱面黏黏的！去到1355，店員話兩點開始下午茶， 唔係好肚餓，所以等到下午茶時段，落單食物逐份來 特色熱狗（選用司華力腸）（$29）本來因為唔肚餓而叫，點知⋯⋯好大隻，尤其條司華力腸，硬幣五蚊咁粗，個硬豬包根本包唔住，硬豬仔外脆內家，烘到微燶熱辣辣，司華力腸皮薄兼脆，有肉汁，好味，蔬菜青瓜太老，中間啲種籽咬唔到！蕃茄片生菜正常，整體好味！$29好抵！我只食到半個包加整條腸！好味！ 熱檸茶：瓦杯，茶底濃但有澀味，一般，店員爽手，豪爽型！店內廁所尚算乾淨但沿途地板超級濕滑，差！茶餐廳都有驚喜

好耐無光顧的一間茶餐廳，於是就外賣左個下午茶餐，跟紫菜湯同凍檸茶咖哩汁雞中翼撈出前一丁咖哩汁都算幾香幾惹味，撈出前一丁真係幾夾，一丁唔會太過腍，食落口感唔錯，個麵搭埋兩條菜心都算叫中和下食撈丁既罪惡感雞中翼炸得好香口，表皮夠脆而入面唔會太乾，而且d雞中翼既size都好似俾一般茶記大少少，不過雞翼既調味就好似重手左d，有d太鹹至於跟餐既紫菜湯就個人而言都係有d鹹，同埋紫菜好似食到有沙咁既粒狀物體，凍檸茶都係普普通通無乜特別總括黎講其實唔太差，只係個餐以下午茶黎講比較貴，不過份量黎睇其實真係可以當午餐食既

上個月叫了一次外賣其中一味係排骨煲,有三份一變了肉片, 以為一次半次,今晚又叫了一樣排骨煲加滑蛋炒蝦仁,點知仲離譜 ...... 排骨煲多左幾舊雞同雞皮,勁多洋蔥, D汁稀到好似水禁; 個滑蛋炒蝦仁,蛋小,蝦還蝦,蛋還蛋,外賣盒底有一"pat"蛋水,份量小我係單叫,唔係晚餐.忍無可忍,打電話比阿姐投訴, 阿姐我要一早話佢知,我心想唔打開食又點知貨不對辦,最後我無要求更換,但以後一定唔會再幫襯,我從沒寫過食評,但今次實在忍無可忍

一間燈光好陰暗既茶餐廳，給人有種好殘舊既感覺。港式、快餐、小炒都有供應，見員工們工作都好熱誠有禮，出品都不錯，係油啲同比較重味，感覺都算良好。本來今晚想打邊爐，行左幾間但間間都爆。咁好啦，轉去食小菜，同樣間間爆場，最後越行越遠，行到黎祥基茶餐廳，見有位，是但照食啦。甘筍粟米湯，配料非常清，但點解可以保到咁濃郁既湯呢？加左濃湯寶？定有大量味精呢？真係濃郁又好味喎。椒絲腐乳生菜炒牛肉，生菜清甜爽口，但係個汁超杰超濃超油囉 ﹗扣分 ﹗肉片入味軟棉，都幾好食，味道偏濃。魚香茄子煲，夠晒熱，滿意。茄子夠腍，味道濃郁，撈飯正呀 ﹗只係油左啲囉。啫啫雞煲，從未食過咁濕既啫啫雞煲。大量汁液遮蓋所有雞件，雞肉入味嫩滑，又幾好食噃。依度係用肉片做底，唔係用豬潤喎，所以香味稍遜，比起用豬潤底既香味差好遠 ﹗

成日聽朋友講太和翠樂街祥基茶餐廳奶茶及自製麵包超好味,今朝特登坐車去試下,哇,一食落去意外好味,奶茶好滑,雞尾飽同菠籮包勁正,問樓面阿姐幾點再有包出,佢話下午兩點四十分都有菠蘿包出爐,於是今日下午兩點八再去試下,叫左個豬扖撈出前一丁,一杯熱奶茶,加個菠蘿包,一共28蚊塊豬扖好正好新鮮,真系實實在在名不虛傳值得一試!

晚上和二位好友經過這裡，全因只想找間有常餐及特餐的茶餐廳，看門面，以為是懷舊的茶餐廳，內裡可能有驚喜也不定，我們三人點了都是特餐和常餐之斃，全都要$32 - 34 。重點不是這個，好食就可以了，我點了普通的: 牛肉通粉 + 餐包 蛋奄列 + 凍檸茶 我朋友就點了和我一樣，另一位就點了 雞翼撈公仔麵 首先: 凍檸茶 ( 冇叫少冰，佢勁少冰，即係五分鐘內會溶哂果隻)牛肉 通粉 : 我同朋友異口同聲 牛肉煲左成日 加上 用粉那過咁 入口即溶我地都算了......另一位朋友的 雞翼撈公仔麵 :雞翼兩隻 細隻得可憐....公仔麵是淨烚 公仔麵 + 一包未開的味精給你....沒有沒有下一次!!

這間店紅叮不算常光顧～其中一個原因就是晚餐實在很貴，和不好食～上次食了一個２７元雞扒撈公仔麵，學了潮語Ｏ咀的表情今次來因為阿哥叫我和他一齊去食早餐，沒有多選擇～唯有來這間～人客都算多～叫了沙嗲牛肉麵，菠蘿包奄列～加杯凍奶茶，飲凍奶茶第一啖就有不錯，但愈飲愈淡，奄列內只有少少火腿～不過不失～最好的是菠蘿包～軟熟沙嗲牛肉麵，也可以一食～不算特別～其實整體只可以說一般～菠蘿包最好食～但如果為它而特登來，這麼就免了～旁邊的茶餐廳也開張，遲些會去試一下～一個人２２元～

呢日同男朋友嚟食下午茶, 叫左:1. 漢堡炒蛋多士+ 熱華田: 幾香, 係一般野2. 司華力腸熱狗+ 茶走: 司華力腸係微暖, 黃芥辣,醬唔夠, 茶走好甜....都應該唔會有下次

響舊雜誌見到呢間餐廳寫低o左，今日經過就決定試下。由於之前食o左麵，所以叫o左快餐同太太一齊食，不過佢另外叫多個奶茶。個餐包例湯同飲品，個湯係粉葛赤小豆豬骨，真係出奇地好味，好濃郁亦唔重味精。快餐我揀o左想食好耐o既窩蛋免治牛肉飯！個汁酸酸甜甜幾惹味，仲好似細個食o固種。牛肉唔係太出色，黏埋一舊，仲實的的。奶茶用黑白牛杯裝住，係咪一定用黑白牛？我唔敢肯定。不過就真係幾滑，而且茶味都算充足，有交代喇。冇期望冇失望之餘，超標完成。

3月一到, 見轉左手, d野食完全唔得, 日日見d熟客都唔見哂, d侍應同茶檔師傅都轉哂... 食開d野變成咁都幾難受以前個事頭婆好有heart, d餐牌全部人手顏色筆寫, 個厚多士同d蛋都好有水準, 而家突然全個班底走哂, 唔知係0米另起爐灶呢? 有冇街坊知轉左去邊呀, 我想要返個飯堂呀....

有一排無幫襯, 一去到見到以前手寫同埋畫既meun轉左, 而且加左價同埋有D生面口既伙計同收銀. 心諗可能耐無黎所以轉左人嗟. 無野既.... 於是就叫左個特餐沙爹牛米奄列加厚多士. 一上個沙爹牛米就知出事. 以前個D沙爹汁無左. D牛肉好似牛肉亁咁.... 最敝係果個加我錢轉既多士. 普通麵包一塊食落入面都係硬既, 好大可能係隔夜麵包一塊!睇見隔離左右食淨好多野食, 叫外賣既又投訴同食開既唔一樣, 於是就問左個伙計先知原來最近轉左手.奉勸各位街坊, 如果想對"祥基"留返個好印象就千祈唔好幫襯, 宜家真係好唔掂!

成日聽D街坊話好正。住左大埔十幾年都未黎過, 終於係上星期六一嘗滋味。個日上昼九點幾, 入面已經無位, 等左一陣, 張卡位既人走左後便火速飛身埋去。我叫左個沙爹牛面餐, Mami叫左雪菜肉絲米餐, 落左order両分鐘, D野話咁快黎到。沙爹牛爽滑, 面既份量OK, 杯熱奶茶好滑。両個人埋單三十零蚊, 好個去飲茶。不過, 好老實講, 係入面食野九成九都係地盤工人、三行佬、街市賣菜既師奶等等, 嘈雜之外裡面仲煙霧彌漫, 若你係好静之人, 入去之前要三思。

星期六一支公剪完髮先食晏, 最鍾意食傳統茶記特餐, 這店仍然有售, 就是餐包+奄列+叉燒湯意+茶/啡, 十幾年這裡賣這個餐無加過價, 仍售$22, 以前餐牌是傳統白紙印字過膠, 幾年前換了顏色筆手寫版, 仲要檯檯本本係咁, 雖然好好心機但唔專業, 勝在座位夠多坐得舒服的, 食物就一般了.