潮樂園 (京街) (Closed)

難得屋企附近開咗間米芝蓮食店，當然要捧吓場試吓新嘢啦！話說有一日朋友發訊息告知我家附近將會開一間潮州滷水食肆，仲要係米芝蓮推介食店。一直期待新店開張，終於俾我等到了。今晚立即要去試吓新店先，店舖不是很大，正正就是大坑小店特色。今晚點咗滷水三拼（鵝片拼鵝腸和牛肚），方魚肉碎粥，紫菜牛丸湯和韭菜豬紅。鵝片非常入味，鵝腸肥美（因為沒有將腸內肥膏刮走，睇怕膽固醇又超標了），牛肚好爽口。另外不得不讚紫菜牛丸湯，牛丸非常彈牙爽口，師傅話係手打出來的。豬紅爽滑，方魚肉碎粥加少許豬紅汁，簡直係絕配！