龍城冰室

Open Now

Now Closed

龍城冰室👍🏻我唔係第一次光顧，每次收工好攰返到屋企附近都會諗到想食佢既念頭😆每次晚飯都會跟湯 平時好鐘意飲返碗 。雖然唔係咩老火湯但已經滿足。大雞扒，上檯個刻 真係好吸引 ，真係嘩左聲，仲配搭左濃郁咖喱汁，正

提醒大家，要食牛扒，都係提議食m就漢堡包仲好過呢間野，起碼食得落肚，唔洗甘浪費🤦‍♀️🤦‍♀️🤦‍♀️🤦‍♀️其實之前都有食開龍城的焗飯既，因為本人都覺得度度焗飯都唔會差得去邊，算係比較穩陣之選啦，但因為今日去到龍城仲見到有午餐供應，於是就諗左一諗，咁就試吓佢個午餐D(牛扒）遠啦，黎到面前，見賣相都算係正常嘅，第一口食左煙肉，感覺都比較偏鹹，但還可以入口，點知到食牛扒時，不但鹹仲係成塊牛肉乾甘，配菜更加唔使講啦⋯⋯最後只有最簡單的意粉🍝可以入到口……

首先，晚餐包含湯、飯和野飲60蚊都算可以接受。牛筋都淋的但幾乎全是牛筋，牛腩佔極少。同埋包裝時可唔可以比返啲心機？我叫兩個餐中所有的湯、飯和野飲全放在一個袋中，對女仔黎講極重，野飲瀉曬，飯和湯都帶有奶茶味😅😅希望改善

返工時男朋友介紹就去左呢一間餐廳食飯😊見到FB都有好多人介紹呢一間餐廳好正，所以就好想去獎勵自己！同大家分享下我自己好鍾意食沙嗲牛肉麵我很喜歡這個，沙嗲味道好濃郁，好juicy， 一點也不靭，好食💯

今日屋企人推介就去左位於銅鑼灣嘅餐廳食飯，望到喺IG都有好多人介紹呢一間餐廳係抵食之選，於是就好想去食嘢！同大家分享下💁🏻‍♀️咖喱雞扒飯意外地有啲驚喜，肉質香嫩，香嫩多汁，非常惹味，回味無窮❤️

19:16分落單 啲嘢食一等又等再等繼續等🙃肉5分鐘到左 15分鐘後 魚仲未到 吹一吹啲staff 佢話:”出緊㗎啦”20分鐘 開始炆 再吹 其實冇人跟過張單 佢話: “不嬲係整20分鐘，快出㗎啦。”25分鐘 再吹多次 佢望一望 走開咗去執枱😚🤭(我真係Dllm)30分鐘 實在太嬲 搵個細粒女仔跟，要到我發脾氣先肯跟。仲要連句唔好意思都冇。30分鐘等咁耐個魚簡直浪費時間。未試過食一間餐廳咁炆憎，真係會blacklist佢唔會再嚟食BYE

你真係要等耐半個鐘頭，你先可以叫依間嘅外賣🙂🙂😓糸人手唔夠定糸做嘢慢？次次外賣都係真係好耐…..半個鐘頭真係等到我燥….上次早餐等足35分鐘😓等到我已經唔肚餓…希望可以改善到依個情況

今日同朋友經過左龍城冰室見到佢推出咗一個酸菜魚午餐就諗住去試下招牌酸菜魚套餐($65)套餐配一大碗酸菜魚，白飯一碗，例湯同熱飲一杯酸菜魚味道非常之唔錯 有小小辣但又吾會話太辣 味道配搭得非常合適 啲魚好嫩好滑無諗過冰室做嘅酸菜魚可以味道咁好 絕對值得一試咖喱薯仔焗海鮮飯($56）呢個係我每次去必點嘅焗飯！真係超級好食！啲咖哩汁好好味有啲似葡國咖喱嘅味道 甜甜地又吾會話好辣另外佢啲料真係起級足！有青口，蝦，一大塊魚柳..真係好抵食！都值得一試

估唔到一年之後又會禁晚市堂食，呢個真係最後的晚餐！趕上出街堂食晚餐既尾班車，咁今日就叫咗個晚餐食！呢個晚餐都算抵食嘅！又有湯又有嘢飲！好高興係我最愛嘅紅湯即係羅宋湯！比得呢個價錢，其實唔會有太多嘅要求！個湯最緊要夠熱，同埋唔會鹹得太過分，呢個湯出嚟嗰時真係夠熱嘅，唔會話太鹹！份量都適中嘅！飲完個湯之後就到主角出場啦！就係牛仔骨配薯菜！初初以為薯菜即係薯條啦，但今日整咗成個potato俾我，當初真係打咗個突，覺得成件事好唔啦間咁！不過我錯啦！用匙羹「北」離食又幾好食喎！真係唔可以以貌取人至如，亦都唔可以以賣相決定個菜好食定唔好食！至於牛仔骨方面，雖然就熟咗少少，但整體來講都OK嘅！都算林我仲咬到嘅，並唔係太多根！個黑椒汁亦都唔算係好辣！只係賣相一般姐！但係都係好食嘅最後有杯嘢飲，由於我趕時間關係，冇影到相，朱古力就係比較淡少少，但係都可以接受！最後希望餐廳一齊加油！希望可以快啲恢復晚市堂食！

重點，d 呀姐態度極劣又西面(由其係一個磨菇頭)，仲要同客人講埋粗口，真係少見，咁樣嘅服務，勸大家唔好試，實後悔。見有時d 人排野隊，又冇人理，d 等外賣嘅，問一句都西人地面。服務態度好重要，唔係個個客都要受你氣。

有食過佢既早餐 覺得多野簡比平時茶記早餐更多選擇仲有佢早餐有配牛角包❤️今次去食中午，想食肉就點點左個紅酒燒汁雜扒餐配意粉，$59吾包飲品中午時分較滿坐，排隊期間前後被問左3次幾位，但又未能入坐😂好似有點混亂個餐有滿滿既肉，剛上枱望落就係一堆野放上去，汁就係晒底😂😂想食汁既話要搬起晒肉先食到…咁食好似怪怪地，如果另外裝會更好 最易出事既牛扒煎得剛好，肉質算嫩有肉汁，相反豬扒竟然出事，太咸喇！再配埋腸仔，煙肉就咸上加咸，個汁都係普普通通，冇紅酒味亦冇燒汁味，只係似較酸既蕃茄汁😅😅🥲成餐食落，好咸，偏貴…順帶一提，對面後來坐左位殘疾人士，係睇吾到野，吾知係咪咁，姐姐連枱都冇抹就帶左佢埋位🥲

打電話叫外賣，俾人係咁催講快啲。去到拎外賣嘅時候，仲要俾人串話就係呢啲人阻住晒，但明明個電話記錄講咗20秒都唔夠。呢啲係咩服務態度？！雖然佢其他分店嗰啲服務好好，不過經過今次都比呢間整臭晒個朵。

平時我都幾鐘意食茶記 畢竟都係香港風味 又好岩香港人口味♥️今日打風 無出去 就搵下茶記食下門口有好多港式麵包買，麵包控既我覺得好吸引！！賣相吸引而且好香，佢用個暖櫃擺住d包，所以即食都會又鬆軟又熱辣辣咁！👅入到去 座椅都算舒適 有好多卡位提供！👍佢個下午茶茶餐都幾多野簡，我地都諗左好耐食咩好🤣🤣🤣佢有d好似coffee shop咁，煙三文魚牛角包配沙律個d, 好多茶記都未必有🤭最後都係揀咗常餐同炒麵，常餐就普通，但炒麵好食，好足料，好香！會再去的一間茶記🥰

今晚一個人，就去咗龍門冰室食個晚餐，唔需要等位，直入卡位，但晚飯繁忙時間，需要搭檯。餐牌好多選擇，小菜，焗飯，扒類，咖喱應有盡有，最後揀左焗芝士牛脷飯，凍奶茶。可能因為焗飯關係，等左15分鐘先上餐，焗飯係炒飯底，濃味芝士汁，厚切牛脷，好好味😋芝士味好濃，好多芝士，可以拉絲的👍🏻牛脷厚切，好有味，咬落好有質感，飯內食得出有少量黃椒。飲品方面叫左杯凍奶茶少冰，不過唔覺有少到冰，正常一杯凍奶茶，沒驚喜。

一個人食晚餐，試下呢間龍城冰室先花甲表面鋪滿蒜茸，非常惹味，但有兩隻花甲係死嘅，滿口沙🙈大白菜好多，食完有d口渴，整體麻麻呢間冰室選擇都幾多，仲有新鮮出爐麵包