金城粥麵 (Moved) New Location

聽日講呢間魚粥好出名,次次黎到呢頭都搵唔到.咁岩 23/9/2008 打正8號風球既日子,去到呢度終於搵到.入面都係似舊式既麵檔除左粥麵,仲有炒飯小菜,不過未試過.價錢都OK,2個人食左都係六十幾蚊.我同男朋友都會再去過食!

主觀d講,明星效應有時真的幾不信得過...可能此店真的只得爽脆魚皮好食...但因本人是不吃魚的,所以不知是否鎮店推介,但以本人試過的食物來計,我發覺只得牛肉炒米 及 芥蘭較好味,亦試過豬瞤肉丸粥,粥底很淡,豬瞤很硬,唯一肉丸較爽口,也試過牛筋...umn...不知怎形容,說真的,牛筋味道很怪.

住左係佐敦咁耐都無去過, 搬左後反而成日去, 次次都係食魚雲粥, 加油炸鬼, d隔夜油炸鬼就梗係唔得啦, 不過點粥食無所謂啦, 佢地d粥比較咸, 應該落得太多味精, 所以次次去都無食晒d粥架, 只不過想食魚雲, 魚雲都算新鮮, 間中會食一兩次泥孟粥, 都唔差, 起碼好過一d掛羊頭買狗肉的弼鋪個d所謂"拆肉泥孟",

看了XX男女的介紹,才知道這老店原來值得一試.專程到來,是龍蛇混雜的地帶,別有一番意境的地頭.下午時份,三點多只有一個客,坐下環顧,只見是五六十年代的感覺,侍應們的年紀都超過五十歲,服務不好也不壞,但對熟客郤有講有笑.叫了及第粥,26大元.十分鐘有得食.賣相很不討好,沒有薑葱,沒有生菜絲,白濛濛.仔細一看,不太稀,不太杰,哂士沒有和味那麼大,豬什是落齊的: 心,粉腸,肚,潤,肉丸.但沒有腰.所有料都是很新鮮,爽滑,肉丸尤其好味,內有大地魚,十分香滑,是近來吃到最好的.粥底綿滑,看到米粒都爆花,米香十足.但有少許味精味.地方很懷舊,地下的階磚已有部份脫色,牆壁上寫滿食物和價錢,連五六十年代最流行的生魚片連湯也有供應,只賣六十元.這店的價錢較附近同類的店稍貴,但食味郤各有千秋.尤其是肉丸,不信可以一試.笑臉是給食物的.

金城粥麵，不但有粥麵,仲有炒粉麵飯．．．一定有一樣岩食～～今次又係睇o左某本雜誌，所以一試。食o左豬潤粥、魚腩粥、豬什炒河、爽脆魚皮～～由於我唔太食豬內臟，同爽脆魚皮，亦唔係一般架炸魚皮，係半生架魚皮．．．第一次認識，所以今次對我係一個挑戰。先說豬潤粥＆魚腩粥，勁足料．．．粥底都好味！！豬什炒河，根據老爸所說．．正如，蔡先生常說個句：「係以前架味道。」到爽直魚皮，食魚皮時，可以配埋蔥絲同薑絲一齊食，再點埋辣椒豉油．．．完全係一食就上癒！！

與朋友仔來到佐孰找吃的，看到金城門前的材料，見到泥蜢，便想到朋友仔很想吃的，那麼就在此一嚐．我也是首次吃泥蜢粥，只因怕魚腥味，又怕多骨．不過熱熱的粥亦很棉很滑，魚亦很多很足料，而且亦沒有腥味，感覺不錯．再來炸醬麵，但因晚了吃，凍了一點，所以很難一評，不過亦是可以．因十時後才有腸粉，剛好等到，吃了叉燒腸粉，亦十分之滑．

尋日諗住食澳洲牛奶公司,點知冇開,男朋友話呢間d粥都幾好食.於是行多兩步就到呢度入到去睇左一陣,叫野食既時候,竟然話冇粥賣,老闆話因為岩岩有班新加坡人黎食晒d粥,又激死,粥店冇粥食,都唔知食咩叫左個叉燒炒河,男朋友要牛腩飯,炒河同我想像中唔同,點解有汁既,係一個有汁既叉燒淋上d河粉面,咁都叫炒?d河粉痴埋一舊,好用力先可以分開,食得好攰,味道一般男朋友個牛腩飯唔知好唔好食,但見佢食晒埋單$54

今日一支公去食晏, 由於冇咩心水想食咩, 於是就邊行邊搵, 行到呢間食店前立即卻步, 心想食粥還是其他好呢? 橫豎都係求其一間, 倒不如試一試啦, 於是乎就入左去!坐底睇左都好耐都唔知食咩好, 又想食粥又想食麵, 十五十六都唔知點好, 於是乎師傅決定要一碗雲吞麵同一碗皮蛋瘦肉粥!率先送上皮蛋瘦肉粥, 粥好夠熱但係唔夠綿, 都幾水下, 而且味精都幾重, 皮蛋都算多幾足料, 但皮蛋唔算好味, 反而仲食到有少少怪味, 而瘦肉就真係幾瘦, 都幾鞋口下, 麻麻地; 雲吞麵反而出色d, 雲吞麵一碗有五粒, 雲吞唔算大粒但個皮夠薄個餡都可以, 係以蝦為主不過係蝦仔, 好細隻蝦仔不過就好爽口, 而麵好煙煙韌韌幾爽口, 有少少鹼水, 湯底夠清味精唔算重, 比麥文記更大碗要好味, 得喎!總括而言呢間食店唔算抵食, $19碗雲吞麵, $20碗皮蛋瘦肉粥, 埋單$39! 環境一般衛生情況一般, d辣手油係冇蓋封住, 仲有d烏蠅係咁飛! 師傅覺得麵好過粥, 如果下次要再黎就一定唔會食粥喇, 不過都唔知仲有冇下次呢?

寫的是渣打馬拉松的早上。大賽六時十分開跑，五時十分就要開始熱身，四時十分便要到達會場附近，換言之，最遲三時半便要吃早餐。一早鎮定要吃個粥做早餐，來這裡，因為還有晚上才供應的即拉腸粉。本來坐店外風涼水冷，但不想聞太多的煙味，就坐店內。人客一點也不少，意料之外的，還是大賽當前，運動員樣子的不多，仍然是夜鬼佔大多數。要了腰潤粥及牛肉腸粉，等了一會粥才來，而等了更耐，才有腸粉。橫豎粥已涼，還是吃腸粉先，相信是即拉，但卻是溫溫吞吞的不太熱。腸粉幾夠滑，牛肉非鮮牛而是如牛肉球的碎牛，十足是吃山竹牛肉的感覺；腰潤粥幾大碗，豬潤薄身，吃落爽口，味道則一般，似乎是隔離街的兩間生滾粥店更出色。豬腰沒有「異味」，也沒有「鮮味」，好在也吃不出「雪味」，如嚼蠟。粥底算綿，本以為味精不算嚴重，但之後當體內的水份消耗後便知，原來也下了重手。埋單37 蚊，以吃得飽的角度來看，是的，想吃碗靚粥，似乎比附近的幾間生滾粥店都弱一線。

忙完公事已差不多12mn，收工前Msn專兄，就咁出來食夜粥。佐敦真是吃夜粥的好地方，街尾有生滾粥，行無兩步又有越興棧，前兩者試過，今次試埋呢間。本來打算吃魚卜粥的，阿姐話來碟炒魚卜，又好，反正都有段時間未試過加薑蔥來炒，又叫了魚骨拼豬心粥，專兄的雞粥就隨粥附送田雞腳一隻。靚粥上來，睇牌面真的好足料，魚骨、豬心、豬潤浮面，粥底介乎於杰、稀之間，個人口味再稀點更好，料是足的，但質素一般，是晚沒吃到米花盡開，綿而香的感覺，材料當中就只喜歡魚骨，爆過後幾香口，再加上喜歡吃骨，情況許可下，拋下規矩連骨吃埋，自從老媽搬出去後，無魚骨吃，所以此品是吃得幾滋味過癮，至於豬心豬潤感覺雪了一段日子，口感極為粉霉，吃了兩口．投降，腸胃不好，對味精愈來愈敏感，此粥，盡了力也只吃得到兩啖。而薑蔥炒魚卜，論質素不及早前吃的生滾粥，只因膠質太薄，口感打了個折扣，而加了大量胡椒、薑蔥來炒，味道極為濃烈霸道，將魚卜的點點鮮/腥味蓋過，最難搞的是與專兄同事吃到苦味，偶是覺得苦味來自酒與sauce的問題，而專兄則說是魚卜問題，結論仍是有．待．更．進。埋單$130，謝專兄～

其實以前我都有幫襯開,不過, 我就未過豬潤腸囉, 作為一個內臟迷, 唔試過, 真係講唔過去, 果豬腸黎講呢,賣相就麻麻喇, 皆因個粉就真係厚左D, 衰鬼0趙落去果嘢, 又真係爽滑分明架喎!, 有粉皮0既滑, 有豬潤0既爽, 真係得, 之但係D涵少左D囉, 可以豪D, 至於個及第粥,粥夠棉,又無乜味精,除左D豬肚我覺得D味怪怪地之外, 我整體上都鐘愛!!

7/12(四) 8:15pm吃罷堂記,仍感意猶未盡;最後一擊,走進龍蛇混雜,百態盡顯的金城,老字號捧場客當然不少.瞄過餐牌後我倆只點了魚腩粥$18;魚腩有別於鋮記或新興棧做法,魚腩沒經爆香,味道清淡,而魚肉保持則軟滑,魚味很鮮.粥底煲得極之鮮及綿滑,質素絕不那過!令人相當回味!服務方面,於此類老牌食店不要寄望得到大叔的笑臉迎人及及熱情對待.為著其出神入化的粥底及仍然期待的腸粉,絕對有重臨之理!

睇完戲跟女友嚟醫肚。呢間老鋪係呢個九反之地屹立已久，自己從小係附近長大，但就從來未試過，真係諗起都有D慚愧...呢度嘅午夜腸粉聞名已久，今次終有機會一嚐...呢D地痞到極而人流複雜嘅小店，女友唔多習慣，食得週身唔聚財，但小弟卻係冇有怕。不過為女友着想，都係嚟過快食la...及第加牛腸，未嚟食已經諗住叫呢兩味...豬肝、豬腸及豬肚皆屬新鮮貨，爽口而冇異味，一流水準；粥底唔算綿，但卻比想像嘅少味精，出乎意料...萬千期待嘅腸粉，好是好，但卻比預期冇咁好--- 皮夠油水，晶瑩但卻不通透，但自己鐘意食比較厚身嘅腸粉，所以食得幾滋味；可惜嘅係料落得比較少，好似食緊"有味腸"咁....對許多"hello夜歸人"嚟講，呢度真係偷閒加油站...可惜我己經唔係呢亭人好耐嘞...

相比麥文記之下,白加士街盡頭,與垃圾站為鄰的金城粥麵,大大話話有四,五年無去過.年前當夜班收得夜.凌晨一點在此有田雞粥,同即拉腸粉作宵夜.無與倫比的享受.除田雞粥外,及第粥,魚片粥,腰潤亦很出色.所有粥品全部在外面的Open Kitchen,即叫即煮.所有材料,用冰鎮著,坦蕩蕩暴露於人前.有人講到話好唔衛生,大菌食細菌,吃過多年,又未見我有事?豬潤同豬腰此兩食材,幾難做得好.前者過生不能入口,過熟會過老,金城的豬潤,生熟程度掌握得很好.質感很滑.豬腰一旦處理不好,一定臭到無朋友.此店豬腰無甚異味,既厚又軟.粥底很綿充滿米香.師傅應該落得很少很少.晚上十點後才供應的即拉腸粉,又係夜鬼之福音.條條拉得晶瑩通透,魚片腸配上香甜的醬油,更是一絕.身處佐敦,名乎其實的"粥戰".食魚粥有新興棧,鋮記一品粥,菜乾粥可去新填地的彩龍,吃得豪一點如罐頭鮑魚粥,348對面的彌敦粥麵可幫到你.及弟,田雞的話,一定係金城.單係在這個四方眶戰地之內,已經有眾粥店等你同佢地"車輪戰".包你戰後,一定全身而退,唔使舖國旗.

食完碗粥底幾綿幾滑的鯪魚球出門口後, 很後悔...他們的粥品是在鋪外, 對住沙塵滾滾的馬路煮的, 那大鍋粥沒有蓋著...很不衛生呢! 雖然味道好, 但以後都唔會再食呀...