蘇花餐室

Open Now

Now Closed

推薦此店的生炸雞脾及薯條，即叫即炸，因此食物非常香口，另外，亦推介該店的瑞士汁雞翼，雞翼非常入味，而且肉質好淋。此小店逢星期一至星期五下午茶餐買一客另一客半價，非常扺食

早餐來呢間，門面裝修不錯。舖位不大不少，十張枱左右。半場已 full ，另半場係冇執枱，有客入先會清理，人手不足。望返D靚野，後面牆係個黑板，即係好細個時上堂用果D ，手繪都幾有趣。餐牌選擇都算多既，揀左 B5 ，煎太陽雙蛋，配火腿鮮蕃茄湯螺絲粉。 睇真D原來通粉 or 螺絲粉只得蕃茄味，唔鐘意蕃茄的人便冇得揀了。太陽煎雙蛋，都幾精神，比一般食開的蛋細隻。火腿正常。蕃茄湯螺絲粉，很大碗，蕃茄味唔會太濃，都 ok。但敗筆在配菜粟米粒，好乾好硬冇汁，偏偏數量又奇多，啖啖都會食到佢。嚴重影響口感，要揀返佢出來又有D煩。加左 $3 歎即磨咖啡，有糖有奶自己添加，幾好飲。埋單 $40 有找 ， so far ok 啦。

去呢間餐廳食嘢又係有攻略既如果你係細食人士想三個人share兩個餐，請你三思！個女店員會黑你面，再問你：你真係要share? 喂丫，三個人叫兩個餐係咪犯法先。。。如果你好肚餓想食呢間餐廳又係要三思！平均等候時間係35分鐘，35分鐘後我老豆個扒終於岀現左，因為太肚餓佢5分鐘清左。佢un un腳撩緊牙既時候我同丫媽個羊架終於岀現。問個女職員要個碟仔啦，佢俾左個奶茶碟我！嗰下真心想講粗口，你係咪玩嘢？老闆你間餐廳係咪一隻正常既碟都無！嬲到飛起之際，喂原來仲有個甜品，叫佢快快手手上完食完我就永世唔會返黎啦，個女店員係到玩電話，上左個甜品俾隔離枱，我終於忍唔住：喂！甜品丫！個女店員仲要好兇咁望住我，我一枱三個人都不甘示弱丫，三個人一齊望住佢，望左十幾秒佢先唔啤我地，笑笑口一個唔關我事既態度入㕑房。最後原來間餐廳係無甜品，係要去附近甜品鋪買🤦🏻‍♀️🤦🏻‍♀️其實之前男朋友係到食過lunch，佢話啲嘢好食，老闆好好人我先同屋企人黎。老闆丫，你個女店員倒哂你啲米啦！

上次喺附近食少爺泰，對面見到呢間店有all day breakfast食，就mark咗下次嚟食早餐。今朝約10點嚟到，店入面唔多人，就坐低睇餐牌。蘇花係一間小店，但坐得舒服。餐牌早餐走茶餐廳路線，但選擇不多，點了all day breakfast 及漢堡薯餅多士餐。茄通先到，普普通通湯底味道蕃茄味不算濃，而且螺絲粉偏硬。跟住漢堡餐到（太肚餓了薯餅吃了一口才記得要拍照）其實所有食物都是即食的味道也很standard,但我會想蕃茄都應該加些調味或烤底，但都沒有。另外all day breakfast 餐到，也有同一情況，蘑菇沒有調味（通常都會下些黑椒炒吧？），也像沒有炒過，有點失望了。另外店內冷氣很弱，見有客人坐下後因爲冷氣太弱而立即離開，幾方面加起來應該不會再幫襯。

昨天的午餐，走到去河畔花園的這間餐廳。我們一行4人，點了兩份黑椒汁炸雞髀蛋飯，一個雜扒飯和一個卡邦尼意粉。雞扒炸得香脆，雜扒亦算 ok, 唯獨個卡邦尼意粉就有點失望，沒有特色，沒有驚喜。再者，我們點了凍檸樂，罐可樂沒有雪凍，只靠冰粒，所以令到杯凍檸樂唔夠氣。以六十多元的價錢一餐，比起“大"字頭的快餐店，較為遜色。

女待應態度極差極差，食物等左超過30分鐘，同個女待應講，佢吋番你轉頭話知，等左超過30分鐘痳，等左超過30分鐘仲要受佢氣。對客人態度奇差，未見過這麼無禮貌吋客人既待應。簡直趕客。食物味道差，鴨胸三文魚飯無味，牛扒188蚊完全無味，話左要七成只煮到三成。該處一帶好多餐廳，真不會再來這間。女待應俾氣客人受，餐廳無水準。完全中伏。

今日同朋友去食，我朋友就order左 all day breakfast，而我就order左個黑椒汁雜扒飯，我朋友果個好快就有，佢差唔多食完我都未有，結果要我打過去問(總店無位，於是我地去左佢既糖水鋪坐)。等等等，等左成45分鐘。過到黎，嘩，啲扒係凍既，啲黑椒汁好差，好似啲水咁，一啲都唔似汁，倒出黎試下啦，完全無味既，啲飯又硬。店員態度差，當我同佢講出問題時，佢都係不耐煩咁話「咁你想點呀？」間鋪既裝修係幾好，但呢次經驗真係好差！

辛苦了整個星期，終於放假啦，放假當然帶媽媽去覓食。天文台預告今天天氣不穩定，將會有狂風雷暴，所以決定在屋企附近開飯啦。下午三時都座無虛席，餐廳除了有正餐外，還有多款下午餐。我們點了兩個午餐卡邦尼芝士忌廉汁闊條麵整體都可以接受，闊條麵軟硬適中，芝士忌廉汁味道調較得很好，很creamy，整體味道不錯。All Day Breakfast我見隔離有很多人都點，份量大，一個人絕對食唔哂。味道方面，蛋香不足，但整體味道較淡。整體而言，食物質素不錯，份量足價錢抵，午餐款式多及特別，下次可以同朋友過去試Set Dinner

喺Openrice 見到呢間，似乎唔錯，就特別去試下。因為我地勁早，6點就去到，無乜人，有都係仲食緊 tea 嘅客我叫咗個 煎安格斯西冷牛扒七成熟首先個牛有少少生，不過還可以接受。最重要係百幾蚊，食到個有格仔紋而又冇梳打粉過嘅西冷牛扒，已經算係咁超額完成！佢叫左份露絲瑪利焗羊架$158 有四枝骨，夠哂飽，對於我哋嚟講佢羊蘇味唔夠，肉味可以，完全唔韌，跟餐甜品有雪糕同布甸選擇，呢兩樣野都有改善空間，啲雪糕我食得出唔係牛奶公司就係牛奶公司，一定係除非唔係

平民午飯時間，見到呢間餐廳個名幾得意就入去啦， 蘇花餐廳，英文為so far so good. 舖頭細細，環境企理。人吾多，吾駛搭檯，so far so good 。牆上畫了幅壁畫，增加了文青的味道。午市套餐都有十幾廿款選擇，今天吃了吉列魚柳鮮茄茸濃湯烏冬。味道不錯，魚柳外層炸得金香，魚肉不會過乾，仲要熱辣辣的，即叫即炸，有誠意。蕃茄湯不過不失，酸酸甜甜很開胃。份量對於女士來說剛剛好。對於經常在左近工作的我，呢間餐廳相信會再次光顧。

吉列魚柳鮮茄蓉湯飯$50嘩!魚柳size差不多有鐵义的長度外表炸得香脆(炸粉不厚)魚.肉OK~(不重雪藏過的味道)蕃茄湯好鲜茄味(酸酸地)飯軟硬度適中(如果加小小糖煮個湯，減左d酸味(更加好味)茄汁焗豬扒飯$66茄汁芝士香濃豬扒大塊(厚切:但豬扒肉質，好硬(扣分)=跟餐熱飲奶茶(茶味不太濃)凍檸茶(餐~凍飲+$3)分量與價錢(符合)味道可以做得更好~

每個weekend 都訓到你死我活，成日OT, 放假想食個早餐真係難個登天，所以all day breakfast 真係一個好好的發明50蚊左右，跟餐仲有個蕃茄通粉或意粉連飲品，飽👍🏼不過我覺得佢個通粉較硬，定係我中意食淋野呢雖然用料唔係咩高級食材，但幾十蚊有齊應有的野，抵啦，仲想點？其實除左all day breakfast, 佢的下午茶都幾抵食，質素唔錯，不過間鋪唔係太大，有時都要等位。奧妮就是喜歡小店。

週日早上，我與家人到沙田河畔附近吃早餐，我們見到店鋪外有人等位，相信應該不錯就即管試一試。我點了一份全日早餐，及一杯凍咖啡（走甜）。店鋪內坐位不多，可能是假日關係較多人幫襯，需要等位。當安排好座位後，有人落單而食物很快到，但不知什麼原因，來錯了飲品，而且不止一次，他們態度不是很好，看似不太願意更換我們所點的飲品，這點令我最為不滿。全日早餐份量十足，另配番茄湯意粉/螺絲粉，略嫌螺絲粉較軟身，如果粉質硬身少少會更有彈性及口感。總括來說，早餐算是抵食之選，但服務態度非常一般。

尋日(2-6-2017 Fri)唔得Ti Amo開門,行o黎呢o度睇,$52.00就有個all day breakfast,於是入去食,我坐低後好快就叫呢個,揀o左鑼絲粉,同要熱奶茶.好快,熱奶茶到o黎,茶味偏淡質地滑.然後鮮番茄湯鑼絲粉到o黎,份量都唔少,鑼絲粉唔會太腍,個湯無添加,OK.食o左幾啖,其他o野都到o黎,咁我先食牛油厚多士,都仍脆,牛油其實唔多,不過都OK.之後食蘑菇,蘑菇只係用油炒過,冇乜味,腸仔,茄汁焗豆呢啲o野正常冇問題;煎蛋個底煎到好脆口;番茄新鮮;而薯餅,外面唔係脆而係硬,最失敗就係呢個.服務K o既,安排座位係俾客人同就o黎食完走o既客人同枱,咁客人好快就可以坐得舒服唔迫夾.每收一樣o野都會同客人講聲.環境:佢o地知道冷氣唔係好夠,就擺把吹扇o係地下吹,但又唔會太凍,唔錯.4.5分

下午茶時間，唔想食太飽，因幾個鐘後又食晚飯，揸車去左河畔搵野食，睇見e間 so far so good,個名幾特別，有all day breakfast, 50蚊，價錢幾吸引，其實就份量比其他店少d,味道普通，但就岩晒我今日心意，食少少就夠。老公就叫左瑞士汁雞翼撈公仔面，佢話好味，d汁幾正，唯一唔鐘意既係杯奶茶，唔係茶餐廳奶茶，有d似係泰國奶茶定或者用錫蘭茶做底，味道唔係人人鐘意，我地食既時候，客人唔多，所以出餐都好快，門口幅大玻璃係黑玻璃，唔怕俾街外人睇到客人食相，細心。