大飯糖甜品小食屋

Open Now

Now Closed

難得在假日找到一間坐得舒服的小店，叫了單骨雞翼和凍檸水，雞亦炸得鬆脆入味，價錢合理，最值得一讚是女侍應的服務態度，十分殷勤同貼心（比在一般大酒樓嘅侍應經常對顧客不瞅不睬的態度真是天淵之別）真是值得推介

肉燥蜜汁豬頸肉飯 $56 : 正常，無特別。咖哩魷魚拼盤 $48 : 有幾舊魷魚，豬皮，蘿蔔，腸仔，都系正常。陳皮魚蛋 $10: 幾實淨，不過就無乜陳皮味咖哩魷魚$38 : 大大舊魷魚同鬚，因為個拼盤入面啲魷魚唔夠喉，所以嗌多碟黎食。腸粉 $15 : 有5條，店員會上醬料俾您揀想要既醬同份量，連芝麻都系任您自己落。芒果爺爺 $69: 上面既北海道3.6軟雪糕好香牛奶味，芒果亦好香，夠甜，唔酸。如果當日芒果酸既話店員會主動話您聽，呢個位非常細心。芒果下層系椰汁果凍，非常香椰汁味，亦幾清甜。食完個果凍之後可以試埋個椰肉，不過當日食得太飽就無食埋。當中有5個人一齊食，平均每人$111，有飯，小食同甜品，真系算扺食。同行友人都話會再翻黎食呢

🔖大飯糖呢間甜品店係元朗，特別係洪水橋區黎講真係一d都唔陌生！我自己都食過好多次，佢既心太軟真係好好食！！暫時食過最好食既心太軟🤣🤣佢既心太軟係可以好多配搭，可以配雪糕球🍦/鮮雜果/榴槤球/軟雪糕⋯🍽心太軟配D24榴槤球黎到又係熱辣辣既心太軟，一下界落去，流心係基本🤣溶哂既朱古力大啖大啖咁樣擺落口都唔覺太甜。之前食試過個面係脆脆地，界入去仲出緊煙架😁D24榴槤球入面食到有榴槤蓉，不過覺得太硬，食落去會減少左榴槤味。之前仲食過配3.6軟雪糕，都一樣咁好食！鍾意食朱古力嘅一定要試試！！💡大圍都有分店😋食物：️9.5/10🤵🏽‍♂️服務：8/10🍴環境：7.5/10💰人均消費：$68🤩性價比：9/10

星期五放工約咗朋友去洪水橋食嘢～因為時間都算早，所以唔洗等位直入～餐廳入面都幾大～好多人企喺外面等外賣💛望住個menu真係選擇困難症～好多嘢都好想食👶🏻最後叫咗2個主食&2個甜品～餐飲重可以加$8轉飲椰汁西米露🤤大滿足! 因為佢係糖水為主，所以對主食無太高expectation～但食完都覺得ok～※三炆三焗牛展麵 (牛骨湯底) $54見佢個名好勁重有讚讚所以就叫咗嚟試🤣牛展真係好冧好入味! 牛骨湯底好香濃～配埋關廟麵食好好🤤※冬菇鮮肉水餃麵 $52朋友鍾意食辣所以就加咗錢錢轉辣海鮮湯底～本身係配豬骨湯的💛冬菇炆得好入味! 鮮肉水餃個餡幾好幾香～但略嫌佢煮耐咗少少令個水餃皮太冧🙈※Baileys綿綿冰 $69我就係為咗呢個而嚟的!🤣比我預期中大份! 有baileys、咖啡綿綿冰、朱古力扭紋雪糕、河粉、紅豆粒&可可脆片💛勁多配料!※鮮雜果楊枝甘露 $42因為好耐無食過所以叫咗😂好多雜果好足料～甜甜的幾好食～

第一次寫食評，因為好想推介比大家 第三次幫襯，甜品Keep到個水準，雖然價錢唔算平，覺得都對得住個價錢既。而且都有心思多樣化 ，唔係兩球來貨雪糕加個西米露又收$30。之前食無試過咸食，覺得不過不失，唔出色但都唔算難食，試左兩樣就普通啦 搬左鋪之後都幾多咸食提供，下次再黎再試試。服務都nice  同正常。最後想講冷氣好夠，怕凍記得拎外套 口味個人喜好，請自行作參考。 多謝閱讀 

平時喺大西北都係會出去元朗食糖水，最出名嘅應該係B仔涼粉。最近聽其他朋友講原來喺洪水橋有間相當出名嘅糖水舖-大飯糖，所以見到網上平台有得外賣速遞就叫咗黎試….心太軟配鮮雜果送到黎嘅時候都仲係暖嘅，心太軟一切開都有流心嘅效果，甜度適中唔會太甜！蛋糕都係用有苦味嘅朱古力去做，所以可以平衡返個甜味。另外鮮雜果係真係選用全部新鮮嘅生果！有香蕉、木瓜、芒果哈密瓜、西瓜，全部都係勁甜？蛋白杏仁茶媽咪勁鍾意食好似雙皮奶咁,蛋白軟綿綿杏仁香味好足,唔會太甜!鮮雜果爺爺鮮雜果同心太軟嘅一樣，爺爺就係有椰青果凍同埋水晶涼粉，呢個甜品係佢哋獨創嘅！食落去好Fresh勁清新,椰皇水嘅甜味好清甜!

多年前已經由舊鋪的大飯糖幫襯到依家，大飯糖的糖水總不會令我失望。有時外賣也要買回家吃，甚至現時他們有外賣服務，買夠某個金額另加運費，就能送到家，非常推薦👍🏻第一樣是楊枝甘露配小丸子 $47楊枝甘露的芒果底很足料，芒果肉也很甜，配上柚子肉、西米，濃稠度剛好。重點是小丸子很煙韌、有咬口，但也不會過硬。第二樣是榴槤球系列，可以配上水晶、西米露、黑珍珠等等，當中有榴槤肉很足料，冰凍的榴槤球就像是吃真的榴槤肉👍🏻第三樣是心太軟，不過堂食會較好，外賣會使朱古力流心容易變固體。堂食的心太軟甜品配上他們自家製軟雪糕，冰火交融的口感，雪糕能融解朱古力流心的甜。另外，他們家的鮮雜果系列，水果大約有4-5款，也很新鮮。若喜歡吃芋圓的話。可以試手芋家園，內裏的芋頭味雪糕與芋圓相當配合👍🏻

我哋食完飯之後去食甜品，入去見到間舖頭好大，有好多位，但個陣都好full，好好生意😂佢嘅menu好多選擇，我同朋友揀咗好耐吓，因為太多嘢想食😂影唔晒個menu，影咗2頁畀大家望下最後order咗心太軟配軟雪糕，個心太軟個流心係相當好食😋仲order咗baileys綿綿冰，我覺得呢個都幾特別，少D甜品店會見到雖然我唔飲酒，但我都接受到佢陣酒味冇幾耐就已經清唒😂會想再嚟食，不過個地點唔算好就腳，有機會先可以再食啦🤣

之前一直食開B仔，經朋友介紹，特意前來一試，我哋係夜晚過黎嘅，不得不說洪水橋的夜晚真的好安靜，除咗哩間糖水鋪！我同朋友嗌咗2個糖水share，發現d碗都幾大份，到最後我地仲有打包糖水拎走，但打包就少咗好多！所以哩間係堂食抵，B仔係打包抵！

📍 大飯糖甜品小食屋 📍💡元朗 錦上路放假同朋友去元朗行下，睇下有咩好食，順便消消暑，經過呢間甜品店就試試佢啦🐥芒果爺爺($69)用原隻鮮椰皇果凍 配 北海道3.6軟雪糕 加 芒果 同 椰子水大菜糕，未食都流口水，食完真係唔錯🐥三色芋圓 配 紅豆($32)分別有 紫薯、黃薯 同 芋頭芋圓 加埋椰奶忌廉， 芋圓好煙韌QQ 味道又唔會太甜🐥芒果之城 ($46)入面有芒果 、芒果雪糕球、星星、黑珍珠、水晶同椰奶忌廉，呢個就麻麻冇乜特別啦

次次黎親大飯糖都淨係食糖水，今次就試試呢到既正餐同熱食。二人套餐👭🏻炸餃子拼燒賣、蜜脆雞翼、東坡肉豬骨湯浸生菜+兩碗肉燥飯再加腸粉魚蛋呢度既套餐雖然感覺上頹左啲，但味道都算唔錯，蜜脆雞翼更加係有驚喜，好有韓式感覺，大家不妨試試佢😆套餐有跟飲品或者用優惠價轉特選甜品，而當日既特選甜品會係店內既電影顯示，🔸因為甜品款式隨時會更新，所以見到岩食既就叫左先，後上都可以架！迷你草莓綿綿冰配軟雪糕、雜果叫個時有啲驚佢「迷你」會好少，唔夠分😂，點知黎到都算大份，唔係一人食量🤫

咁係屯元天的地方搵間糖水都算小之有小咁搵到一間叫大飯糖啦咁就點左最出既魷魚咖喱拼盤基本上我次次黎都係因為依個拼盤而黎需然價錢都唔算太抵 但味道好夠👍咁另外依個炸燒賣就一定要問佢拎泰式辣醬配合以食。因為燒賣都幾重魚肉味。但係經過炸之後 炸既香味蓋過魚肉味咁3.6牛奶雪糕已經冇得輸啦 香滑加上牛奶既濃密味 真係好正👍個布甸就普通普通心太軟我覺得都幾好 一野劈落去 入既流心已經流晒出黎👍本身甜品都不算太甜 再加上雪糕已甜度就岩岩好另外叫左炸物都不錯 起碼d 炸粉唔算太厚👍👍

🥭芒果之城 💵46🍀🍀🍀🍀🍀🍀🍀🍀🍀 聽個名好似好威咁😂入面有芒果雪糕、星星、水晶、芒果、黑珍珠同椰奶忌廉，芒果🥭就好酸😖都無咩特別～🍮焦糖燉蛋💵32🍀🍀🍀🍀🍀🍀🍀🍀🍀🍀我同朋友揀左凍既焦糖燉蛋，配雪糕🍦+$16, 因為焦糖關係所以燉蛋既面表脆脆，燉蛋入面亦有雲呢拿籽，做燉蛋一定要加雲呢拿籽😝雪糕都好奶味，係幾好食其實都幾貴～🍠三色芋圓💵24🍀🍀🍀🍀🍀🍀🍀🍀🍀🍀三色芋圓入面由紫薯、黃薯、芋頭做既芋圓，再+$8配樣糖水，我地揀左紫米露🥲紫米露好淡，甜度唔夠，而芋圓唔似出面個啲硬梆梆，但未話好好食～☀️整體而言，唔知係無得揀定真係大多數人真心覺得正😂好多人排隊買糖水食，揀左3樣野之中，最好食同會翻撻既係燉蛋，但價錢偏貴，依個價錢可以食餐平民飯🤪

呢間真係性價比好低，啲甜品定價好高，仲貴過食餐正常嘅飯，份量又唔多，味道普通，環境唔係好舒服。不過有樣嘢係值得一讚嘅，就係有洗手盆同洗手液可以食嘢之前洗手，除咗KFC之外，都無咩餐廳做到呢點。

今日經過呢頭，記得呢間大飯糖都幾有名同好食，所以就入左黎食喇身為飯桶既我係一定要食飯既～～ 識食既梗係食咖哩啦～登登～～咖哩雞翼飯～～ 咖哩偏甜少少，微辣，炸雞翼好出色，好脆，脆得黎好juicy呢個飯比我最大驚喜係白蘿蔔平時既咖哩飯通常係配薯仔，但大飯糖係配白蘿蔔錦上添花本人極度喜愛白蘿蔔，好入味，好淋，冇渣