Second Bite Bar & Cafe (紅磡灣中心) (Closed)

阿來！阿來！yummy咁解，真係唔好俾呢間小清新外表嘅餐廳呃咗啊，食物對得住價錢，服務對得住加一。朋友揸車黎，所以想坐窗口門口位望住隨時走鬼，職員都好細心，知道咗都安排咗個最佳位置俾我，嗰陣時我就決定百分百支持佢。落單叫店員幫手推介下，佢問我地兩個人餓唔餓，堅餓，佢就建議咗以下食物，一條香茅鹽燒魚，一條燒粟米，一個小食薯條，一個意粉，加埋飲品，最後要兩個外賣盒先裝得晒，又可以食多餐🤣🤣🤣食物配搭創意十足啊，個意粉連配菜都搭得好用心，點會估到意粉會用泡菜同辣茄，仲搭兩件茄子，辣又唔係好辣，完全無維和感。而泰式魚同條粟米，都會有錯覺自己瞬間嚟到泰國餐廳，魚鮮湯夠味香茅味重，條粟米加咗芝士鹹蛋黃碎咁，甜甜鹹鹹，有驚喜。杯西柚解渴，茉莉茶底，清清地又大杯，到最後連片柚都啜埋。到埋單，職員都主動問要唔要打包，又話好餓又食唔晒，大佬，條魚個湯都清埋，又當一味餸㗎啦！😂 不過都多謝佢嘅推介先食到好嘢，唔好浪費食物啊嘛，講真呢度夠三四個人食。