California Pizza Kitchen (Closed)

今日同家姐嘅幾個朋友嚟到將軍澳嘅POP CORN，正值晚飯時段，我哋就分頭逐間餐廳拎飛，邊間快就食邊間，結果就係登登登登，CALIFORNIA PIZZA。超肚餓嘅我哋叫咗黑松露湯，前菜就係墨西哥風味雞肉烤餅，而主食就叫咗秘製鮮蘑菇、辣肉腸、肉腸薄餅、生菜包同埋蒜香忌廉汁雞肉闊麵。個人而言，今餐我最鍾意個黑松露湯，松露味十足，而且blend得均勻香滑，一飲就知係自家製絕對對得起個價錢，對比起某d餐廳比七八十蚊但serve罐頭湯真係相當有誠意!墨西哥風味雞肉烤餅整體不錯，雞肉想辣，份量一份作為前菜的話唔多唔少剛剛好，如果個皮可以脆身小小就更加好。秘製鮮蘑菇、辣肉腸、肉腸薄餅，值得一提嘅係鋪喺pizza面嘅辣肉腸，辣得過癮，風味十足，不過唔食得辣嘅朋友就最好唔好叫啦。而最後嘅生菜包同蒜香忌廉汁雞肉闊麵都係一般。生菜包就真係普通嘅生菜包，雖然配上嘅醬汁幾特別，但都帶唔倒佢走出平庸。而蒜香忌廉汁雞肉闊麵，冇蒜味，忌廉汁亦冇乜，乾身到不得了。下次再有機會嚟都係會叫返湯類同薄餅類比較穩陣。