Home Sweet Home (Closed)

雖然近日社會氣氛並不好，但飯也終須要食，本身仲擔心位於「太子站」後一條街嘅Home Sweet Home今晚仲開唔開，但其實呢度好似未受影響，入夜後仲幾好生意。除A La Carte外，應該會比較多人選擇晚市套餐，套餐包括前菜、主菜、甜品及餐飲，份量足夠，仲食到幾飽添。 （主菜）澳洲和牛柳•芝士烤波士頓龍蝦（$468/套餐）- 和牛肉質軟腍，帶適量肉汁，由於採用澳洲嘅和牛，因此肉味較為濃郁。主以鹽及黑椒調味，亦加左少量rosemary。龍蝦用芝士及白汁焗，都幾香口，但肉唔多。（主菜）扒澳洲鮮殼飼安格斯肉眼•燒薯（$398/套餐）- 雖安格斯不及和牛，但食起上黎都唔差，肉味適中，邊位補一層厚厚嘅脂肪，食起上黎又幾有油香。雖調味差不多，但呢塊扒嘅rosemary香草更多，味道更濃郁。（餐酒）Sauvignon Blanc - 較入口級別嘅一款白葡萄餐酒，味道較fresh及清新，帶果香，微酸。（是日甜品）綠茶撻配朱古力雪糕 - 雪糕偏甜無乜特別，重點係右邊嘅綠茶撻，微暖，曲奇皮脆香，綠茶醬呈流心狀，香甜得很。