炑八韓烤 (瓊華中心) (Closed)

前排播緊《魷魚遊戲真人Show》，上網搜尋下資料，見到OpenRice個到炑八韓烤有呢個「聖紅綠燈魷魚遊戲韓烤套餐」，預訂仲有88折優惠，即刻book檯同朋友去食。成個套餐份量超級豐富，包括新鮮魷魚、醬油五花肉、梨汁雞肉、深海鱈魚肉、韓式香腸、安格斯外裙肉、和牛牛肋條及月見牛腹肉，再加埋幾碟開胃前菜，擺滿晒成張檯。個人認為最好食是脂肪紋路超靚的安格斯外裙肉，以及腩肉油脂豐腴的醬油五花肉；而肉質柔軟牛肉味濃的和牛牛肋條入口好嫩滑，月見牛腹肉燒完之後都好香口，原來蘸上蛋黃醬料食更加好味添呀；魷魚確實鮮味十足，燒完仍好爽口彈牙；其實好怕燒魚肉，驚會痴爐同散開，但呢幾塊深海鱈魚肉又唔會喎，肉質厚實有彈性；香腸、雞肉及少量蔬菜配料亦都水準ok。因為單食套餐已經太豐富，連可以無限添加的前菜、爐邊蛋及芝士粟米都只係食了一round而已。紅綠燈沙冰色彩好鮮豔，味道亦清新，乳酪草莓味尤其好味。另加的甜品椪糖曲奇雪糕，跟足劇中的椪糖令人好想玩完先食，配埋雲呢拿雪糕就更滋味。