Tea台屋

Open Now

Now Closed

【九龍城區】【Tea台屋】食過三四次呢間嘢，都真係食咗好耐。雖然好想再食多次，影啲嘢影得全面啲先出 post，但係我真係冇乜動力再食一次。就係咁樣一直都拖住咗，明明呢篇係 1am紅館 系列嘅。然而最近真係完全無稿，侷住寫佢，咁就寫啦。有記錄之下嘅第一次係食晚市 $68 嘅「台灣香腸拼冬菇肉燥飯」，我覺得呢次肯肯定唔係第一次不過搵唔返再之前嗰啲就算啦。因為記得佢個飯都係普普通通，只係啲肉燥都唔難食，勉強可以送晒碗飯，咁都冇咩好講喇。另外叫咗 $32 嘅「脆爆雞翼」三隻，其實就即係炸雞翼，冇咩特別嘢發生喺佢身上，就係好一般好純粹嘅炸雞翼。嘢飲方面，食嗰個咁嘅飯加 $7 飲「鮮奶冬瓜茶」，冇預佢好飲所以普通味道都冇令我失望，咁樣夾埋就 $107。有圖片記錄嘅仲有一次，就係食 $65 嘅「紅燒牛肋條麵」，呢個就比較似我第一次會叫嘅嘢，不過睇返日子係後啲就由佢啦。咁同上次感受唔同，個紅燒牛肋條係整得唔差，可惜僅此而已，紅蘿蔔、豆卜都係令人提唔起勁嘅。飲品方面，今次我叫嗰個好似係要加 $12 先有普通嘢飲，同上次嗰杯特飲唔同。咁我就飲「仙草奶茶」少甜少冰啦，味道都平庸得嚟有啲假，夾埋又剁我 $77