Video
Read full review
2016-07-07
518 views
我成日中午 LUNCH 都想食吉野家牛肉飯，但附近就偏偏無吉野家，一心等佢開分店啦。點知，今日 LUNCH 畀我發現附近間 KFC 竟然有賣牛肉飯，真係好有驚喜。之前明明記得有供應呢個牛肉飯嘅分店都唔係公司或者屋企附近……唔理咁多，食咗先講。呢個飯好似唔多人點，大多數人都係食返蘑菇飯同雞皇飯，我就最鍾意試新嘢，所以就點都要食。呢個牛丼套餐（包熱茶／可樂）就38蚊，多嘴嘅我就問下有無得散叫。店員好似都唔清楚，試下禁下篤下部機，結果發現係無嘅，但就可以加錢($3)多碗麵豉湯。一眼睇曬，理想同現實。實物包裝賣相好一般，又慳皮，將原來碗飯散發出嘅少少仙氣都抹煞埋。牛肉飯用方形紙盒盛載，上層係日式牛肉（連汁），下層就係白飯，將汁同飯分開，咁樣可以迎合一啲唔鍾意用汁撈飯嘅朋友，夠貼心！咁即係好唔好味？牛肉份量唔算太多，亦唔會太少，但啲汁睇起嚟真係幾濃，無吉野家咁稀，似「醬」多啲。飯，標榜話飯質珍珠米煮；我平時少食珍珠米，所以唔多識分好唔好。但我覺得啲飯好軟糯，有啲甜味。咁牛肉呢？牛肉同樣係肥牛，同樣係切到薄薄長長咁一塊，同吉野家差唔多。醬汁方面就話係同有百年歷史的日本大多福一齊配製嘅，望上去好似淺
我成日中午 LUNCH 都想食吉野家牛肉飯，但附近就偏偏無吉野家，一心等佢開分店啦。點知，今日 LUNCH 畀我發現附近間 KFC 竟然有賣牛肉飯，真係好有驚喜。之前明明記得有供應呢個牛肉飯嘅分店都唔係公司或者屋企附近……唔理咁多，食咗先講。
呢個飯好似唔多人點，大多數人都係食返蘑菇飯同雞皇飯，我就最鍾意試新嘢，所以就點都要食。呢個牛丼套餐（包熱茶／可樂）就38蚊，多嘴嘅我就問下有無得散叫。店員好似都唔清楚，試下禁下篤下部機，結果發現係無嘅，但就可以加錢($3)多碗麵豉湯。
一眼睇曬，理想同現實。
實物包裝賣相好一般，又慳皮，將原來碗飯散發出嘅少少仙氣都抹煞埋。牛肉飯用方形紙盒盛載，上層係日式牛肉（連汁），下層就係白飯，將汁同飯分開，咁樣可以迎合一啲唔鍾意用汁撈飯嘅朋友，夠貼心！
咁即係好唔好味？
牛肉份量唔算太多，亦唔會太少，但啲汁睇起嚟真係幾濃，無吉野家咁稀，似「醬」多啲。飯，標榜話飯質珍珠米煮；我平時少食珍珠米，所以唔多識分好唔好。但我覺得啲飯好軟糯，有啲甜味。咁牛肉呢？牛肉同樣係肥牛，同樣係切到薄薄長長咁一塊，同吉野家差唔多。
醬汁方面就話係同有百年歷史的日本大多福一齊配製嘅，望上去好似淺色嘅蠔油，但就唔似蠔油咁「杰撻撻」。味道鹹鹹哋，又甜甜哋，同平時吉野家牛肉飯個味差唔多，不過個味就 long lasting 啲，應該係同啲醬濃稠啲有關。
有人話，食吉野家嘅牛肉飯係為咗啲洋蔥，KFC 嘅牛肉飯一樣有洋蔥，每一塊都好似大塊啲，但可能因為太塊咗，所以食起嚟就唔似吉野家個啲咁「腍」（不過有時係太腍，腍到一pat 嘢咁）。不過 KFC 呢度係無得加汁嘅（可能個汁成本都貴），如果覺得飯太多，就建議先用牛肉同洋蔥餸飯，食到差唔多之後先將汁倒入飯裡面一齊食，咁樣就唔會有飯剩啦～
BTW，女仔黎講，飯好似有啲多，男人食就應該啱啱好！唔怪得個餐無薯格／蛋撻／雞翼啦！如果堂食，可以好似幅宣傳圖咁樣用碗上檯嘅話，感覺真係正好多呢！最後個杯熱嘅蜜糖綠茶都幾特別，有個綠茶茶包係裡面啦，本來唔多覺有蜂蜜味，以為係普通綠茶，但飲飲下覺得甜甜哋，同平時飲開嘅唔一樣。睇返資料，後嚟先知道原來係蜜糖綠茶，又幾特別喎～
Post
