雲在線小鍋米線紅薯粉

Open Now

Now Closed

近排聽到屯門街坊推薦一間嘅米線店話佢嘅豬頸肉俾雲川燒更加好食，雖然佢位置有啲格攝，並唔係屯門市中心嗰邊，但係小編都決定去試吓酸辣（豬頸肉+腩肉）$59麻酸辣（豬頸肉+鴨胸）$59首先試一試佢嘅湯，佢嘅湯同大部份米線一樣都係酸辣麻辣個類，味道就係所見即所得，有齊麻酸辣，但硬係覺得差咁啲層次，冇乜其他味道。不過小編留意到好多街坊都會嗌魚湯，可能會好味啲，下次小編會去試吓。講返呢度嘅餸，全部一律都係加$13，係會貴少少，但佢每個餸都好大份。首推一定係豬頸肉，唔單止份量較多，而且煎得非常香口，有唔少嘅窿邊位。佢嘅醃料味係鹹鹹甜甜，有少少似叉燒咁，外表甜甜哋，有少少焦脆，而且唔會好似雲川燒咁切得太細條，仍然有一定嘅口感。其他嘅餸都唔錯，而且份量好多，例如係腩肉，煮得非常之腍，有少少似食糭入面嘅肥豬肉咁，但小編略嫌佢肥咗少少。另外我哋都嗌咗鴨胸，雖然係來貨，但份量都好夠。小編之前試埋蒜香雞扒，蒜蓉香味非常充足，而且雞扒唔會過老過柴，唯獨是鹹咗少少。整體嚟講小編覺得呢間嘅米線舖嘅餸都非常之唔錯，尤其是係豬頸肉，確實比雲川燒更加好食。不過佢哋嘅湯底就普通咗啲，個人覺得如果係住喺大西北都可以過嚟試吓。*