金園茶餐廳

Open Now

Now Closed

【深水埗區】【金園茶餐廳】之前講到喺蒙古做嘢識到香港朋友，佢知我做 foodie 嘅，所以都喺對話裡面包含好多飲食嘅元素。嗱又咁講吖，好多嘢都係講吓是非嘅啫，呢啲嘢又冇理由擺上枱面講，所以都係講返我哋做過嘅飲食交流咪算囉，係咪。咁大家見到呢間係茶記嚟，就知我哋講親啲都係比較市井啲嘅飲食文化。香港呢個地方都係經歷咗好多年嘅拼搏，加上民智上比鄰近地區早發展，所以先有今日嘅煇煌。其實當年嘅平民百姓，咪又係由呢啲唔起眼嘅茶記養大。嚟到長沙灣呢間金園，都係經典嘅格局，不過感覺佢哋裝過吓修，有啲新淨。叫咗個 $45 嘅「全日經典麵餐」，加 $8 轉「香煎雞扒麵」，都幾大碗，配菜仲有「火腿奄列」，不過整到好薄，隻蛋略嫌唔夠生、唔夠滑。加 $2 轉嘅「牛油多士」幾好食，呢塊包似樣，牛油亦都好香。餐飲飲「熱奶茶」，都係好飲嘅。之後用 $14 叫埋「鮮牛油菠蘿包」，個菠蘿油叮到硬晒，唔得。夾埋 $69 埋單，價錢可以啦，下次點都要食「酥皮蛋撻」至得。。。（地址：長沙灣青山道314號地舖）#1amfoodie #foodie #hkfoodie #thatfoodiething #hkfood #food